ORANJESTAD (AAN) — Diamars cu a pasa, ex-minister Otmar Oduber a entama un caso cu a tuma lugar den Corte,
unda el a exigi pa bay na Hof, pa pidi’e pa a base di negacion cu tabata tin di parti di Ministerio Publico, pa cuminza un investigacion riba tres funcionario di Husticia.
Oduber a splica cu e dilema aki di Flamingo a cuminza mas cu tres aña pasa, riba ocho process verbal cu a wordo traha door di e personanan aki, entre otro e caso di Flamingo a haya ok di PG pa habri pa haci investigacion.
Oduber a bisa cu awo nan a haya sa y ta realiza y den Corte a wordo confirma cu ningun di e 8 ocho processnan verbal aki ta e base mas pa loke ta trata investigacion riba e caso Flamingo.
“Tur a wordo bati for di mesa, no ta cuestion cu un parti di un di nan ta den dje ainda, tur e ocho processnan aki a wordo elimina, y pa tal motibo cu ta un muestra bon cla pa nos comunidad , manera mi a bisa na Corte diamars ultimo, cu ta imposible pa nos tin e confianza den un sistema hudicial akinan, muy particularmente Ministerio Publico, cu bo ta verwacht cu ta haci un trabao imparcial y husto. Husto ta e palabra mas importante den e caso aki, no pa cu Otmar pero pa cualkier ciudadano of comerciante aki na Aruba”, Otmar Oduber a subraya.
El a agrega cu ora tin ocho acusacion di cual ni un a resta, anto algo ta fundamentalmente robes. Pero full e base riba cual nan a haci investigacion, nan a interoga su persona, nan a cer’e y mantene cera den KIA, ta basa riba e ocho motibonan aki.
“Den e caso cu mi a lanta a resulta, den articulo 85, cu e procedurenan cu tin den ley, mi a exigi indemnizacion contra e personanan aki, cu a traha claramente e processnan verbal falso aki. Den e caso aki mi a acusa nan y mi ta convenci den e caso aki cu tin meymey denuncia falso of simplemente, nan a haci esaki pa un persecusion politico pa perhudica un politico activo cu tabata tin na e momento aki”, Otmar Oduber a indica.
Na di dos lugar, el a añadi masha duidelijk, cu Ministerio Publico su unico palabra den Corte riba tur su defensa, pa loke ta trata cu Oduber kier exigi un investigacion di Landsrecherche, den e caso aki di e sistema hudicial di OM, riba e tres funcionarionan di Husticia, ta pasobra nan ta haya cu e ta falso. “Nan argumento tabata cu no, cu nan a haya informacion di informante. Y cu nan como ‘verbalisant’ unico tarea cu nan tin, ta pa asegura cu e informacion cu nan ta haya for di e verbalisant ta uno cu ta confiabel. Den e caso aki nan ta bisa cu nan a haya informacion di hendenan confiabel, pero cu nan no ta esnan cu ta verifica cu informacion cu e hendenan aki ta hiba. Algo cu pa mi ta totalmente inaceptable”, Oduber a subraya.
Otmar Oduber a remarca cu awo el a entrega un keho adicional na esun contra e tres verbalisantnan di KPA y e sistema hudicial, cu e ta considera coleganan compinche di Ministerio Publico, basa conforme loke ley ta stipula, contra tur e informantenan cu tabata tin e ora ey y a duna informacion na e tres funcionarionan cu a traha e ocho processnan verbal.
