WEB Aruba NV ta pidi disculpa pa e eror den switchmento

Di con a escoge net Diasabra anochi pa bay switch...

ORANJESTAD (AAN): A bin sali na cla, cu net riba Diasabra anochi ey, e momento cu hopi hende na Aruba tabata na un di e cantidad di actividad cu tin rond di e isla, cu algun persona na e planta di WEB a dicidi na bay mishi cu un switch, mientras cu henter e planta ta funciona perfecto pa mas di 2 luna caba.

   Nan a bay switch na e sistema di Automatic Control di monitor coriente, y algo a bay malo.  E switchmento no a logra, y na final ta henter e isla a keda mas di 2 ora y mey largo sin coriente.

   WEB Aruba NV ta bay investiga awor di con ora cu nan a switch for di ‘local control’ pa ‘general control’, algo a bay malo.

   DIARIO ta sugeri nan tambe investiga, di con a escoge pa haci esaki net riba un Diasabra anochi.

   E siguranza cu lo bay haci “investigacion” ta duna pueblo trankilidad?  Pasobra ya caba tabatin 3 otro blackout anterior na Aruba den 2022 y cu nan tambe a wordo investiga.  Pero e resultado no a produci nada cu a salvaguardia e isla di a bolbe haya un blackout riba Diasabra cu a pasa.

   Director di WEB Aruba NV, esta Alfredo Koolman, a indica cu ta 8:15 pm e blackout a socede, siendo cu awor henter Aruba tin e horario corecto danki na tur smartphones, y por a mira cu tabata 8:12 pm.  Ni e horario mes e no sa bon!

   A tira tur culpa riba un switching cu a socede Diasabra anochi, pero den mesun rosea a keda blof cu cada rato ta suministra informacion na “tur stakeholders”, incluyendo NV Elmar, Raad van Commissaris, y Ministro.

   Atrobe WEB a bolbe corda pueblo cu nan ta den fase di transision eliminando Boilers pa semper, y bay over pa motornan RECIP, y cu nan ta den transicion pa hinca ainda RECIP IV di 102 MegaWatt den nan sistema completo.

   Koolman a bolbe priminti cu WEB Aruba NV atrobe a tuma su medidanan pa percura cu nan no ta ripiti, y lo drenta den contacto cu e fabricante Wärtsilä di e motor RECIP pa haya mas feedback.

   Na final, Alfredo Koolman na nomber di WEB Aruba NV a bisa di ta lamenta y ta pidi disculpa na pueblo y comercio pa loke a sosode Diasabra.