ORANJESTAD (AAN): Diasabra marduga banda di 1:15 am, net ora cu unidad di Polis ta patruyando, nan a mira den Driemasterstraat un Nissan Cube shinishi coriendo sin cu e plachi di number tin luz riba dje.
Polis a duna e chauffeur un señal pa stop na altura di Rudolf Arendstraat, y den e prome contacto cu e chauffeur femenino, Polis a haya holor di alcohol for di su aliento. Tambe a mira cu den e auto tin un cantidad di boter bashi di cerbez.
E chauffeur no tabatin rijbewijs pa duna Polis, aunke el a bisa cu el a caba di slaag pa su Rijbewijs Categoria B. El a mustra agentenan su documento di Rijbewijs Examen.
A base di tur esaki, Polis a pidi’e su cooperacion pa haci test di supla. Ora cu el a supla riba e machine di Alco Sensor IV, esaki a mustra cu el a viola e maximo permiti. Pues e ta basta bao influencia di alcohol.
A base di esaki, el a wordo deteni pasobra a viola Articulo 5 inciso 1, Articulo 21, y Articulo 10 di Ley di Trafico. El a wordo hiba pa Warda di polis.
Na Warda di Polis el a ser presenta dilanti Fiscal Auxiliar, y a base di tur e observacionnan di e patruya, e Fiscal Auxiliar a dicidi na kita su rijbewijs. Esaki e chauffeur no tabatin den su poder toch.
Despues a duna ordo pa e chauffeur femenino wordo encarcela den un cel na Warda di Polis na San Nicolas.
E auto mes a wordo lastra pa Warda di Polis na Santa Cruz, como cu e auto tampoco tabatin nada di documento legal den dje.
