Asina Fundacion Betico Croes a celebra Dia Nacional na grandi

ORANJESTAD (AAN): Dialuna 18 di maart Aruba henter ta celebra Dia di Himno y Bandera. Dos simbolo di nos autonomia, identidad, libertad y union.

   Net 48 aña pasa nos a hisa nos bandera y a canta nos himno pa prome biaha; pero for di semper, nos pais a briya cu luz propio, un luz cu no lo paga nunca. Un luz cu ta e muestra di e curashi y e pasion di nos hendenan pa Aruba.

  Riba e dia special aki, tambe nos ta corda ariba nos Status Aparte y aki nos tin cu bisa: Danki Betico pa haci realidad un gran soño di un pueblo luchado y balente.
  Pa conmemora nos fecha nacional, Fundacion Betico Croes a realisa un tremendo actividad cu musica, danza, wega, cuminda y yen di actividadnan pa grandi y mucha. Multitud di hende a bishita Plaza Status Aparte Gilberto F. Croes den curason di Santa Cruz pa asina comparti y demostra hunto e orguyo di ta Arubiano.

   Tambe Fundacion Betico Croes a presenta su directiva nobo ariba e fecha special aki. E meta di e Fundacion ta pa sigui engrandece e nomber di Betico y pasa esaki di generacion pa generacion. E fundacion tin diferente plan cu actividadnan cultural y educativo pa nos pueblo, como tambe e embeyecemento di Plaza Status Aparte Gilberto F. Croes.

   Directiva nobo a bira como lo siguiente:  President ta Dennis Croes, Vice President ta Maikito Croes.  Secretaria ta Judith Werleman.  Segundo Secretaria ta Winnie Dirksz.  Tesorero ta Mirto Croes. Segundo Tesorero ta Ebby Rasmijn.  Relacionista publico ta Tatiana Eman.

   Como Comisario tin Jeffrey Schuilenburg, Chelito Dirksz, Angelique Maduro, y Rosemin Croes.

   Riba combinacion di potret por aprecia momentonan precioso cu a worde comparti pa esnan cu a asisti, memei di un dushi ambiente cu a cuminsa for di 10'or di mainta te cu 6'or di atardi.

   Fundacion Betico Croes ta yama pueblo di Aruba DANKI y ta bisa un y tur: Keda pendiente pa mas eventonan cultural cu lo sigui trece unidad pa nos pueblo, rond di actividadnan cu ta fortalece nos identidad.