Voto di delincuente den Parlamento a yuda baha Gobierno!

Apertura di Parlamento 2024 ta rementa e base di gobernacion Aruba

• Misterio con Benny Sevinger tabata na haltura di candidato di Raiz
• Caida historico di Gabinete Wever-Croes ta cuestiona integridad Raiz 

ORANJESTAD (AAN) Na e momentonan cu mundo ta aplaudi e logronan enorme di Gabinete Evelyn Wever-Croes y Aruba a bira modelo di bon gobernacion pa mundo, den sala di Parlamento di Aruba un bom a rementa.

   Den un situacion unico cu a presenta, e voto di un persona cu a wordo condena dor di Huez na castigo di prison, a yuda sostene caida di Gobierno Wever-Croes den uno di e desaroyonan mas tristo den historia di Aruba.

   Manera DIARIO a splica ayera na Aruba, e acuerdo pa gobernacion a base di resultado di ultimo eleccion, a duna MEP e derecho pa dicidi kende lo ta Prome Ministro di e pais pero tambe e derecho pa dicidi kende e kier como candidato pa Presidente di Parlamento.

   Pa Parlamento dicidi cu un persona no ta apto pa fungi como Presidente, e mester basa su mes riba ley for di cual e por destila prueba legal y e mester entrega prueba pakico un persona ta incapaz pa fungi como Presidente di Parlamento.

   Den persona di mr. Edgard Vrolijk, Aruba a conoce un Presidente di Parlamento, cu ta tene su mes na loke reglanan ta exigi pa e por dirigi Parlamento.

   Te awor no tin ningun prueba cu por considera legal, pues cu ta demostra cu el a kibra ley. Mas bien por papia di un maneho hopi estricto cu el a hiba.

   E hecho cu Raiz no gusta e persona di Presidente di Parlamento, no por conduci na un situacion den cual Raiz contra tur regla ta presenta un otro persona pa bira Presidente di Parlamento.

   Mas sospechoso den henter e asunto aki tabata cu a bira uno di e tradicionnan lamentabel den Parlamento, cu oposicion no ta bay di acuerdo cu e candidato di partidonan cu ta forma Gobierno.

  Partidonan di oposicion ta vota blanco, pues sin opinion, of ta presenta candidatonan cu presentacion di diferente nomber.

  E voto pa Presidente di Parlamento ta secreto y segun palabracion di Gobierno. Ta sumamente straño con oposicion y Raiz a vota pa e mes persona, cu ta e miembro di Parlamento di Raiz, Kamperveen cu asina a bira contra palabracion cu MEP, Presidente di Parlamento.

   Pa oposicion y Raiz cu tin solamente 2 asiento den Parlamento por a eligi Kamperveen como Presidente y haya un mayoria, Benny Sevinger tambe mester a vota.

   Esaki ta nifica cu e voto di Benny Sevinger tabata sumamente importante pasobra tabata pa un vota di diferencia cu Raiz a logra su meta pa kibra e acuerdo di votacion.

   E pregunta grandi ta bira con Benny Sevinger a vota pa Kamperveen cu hunto cu Raiz, a bay contra presencia di Benny Sevinger den Parlamento di Aruba ya cu Benny Sevinger realmente ta un persona cu un condena di Huez cu a mande prison.

Raiz a manda un carta pa Mike den pasado pa opone presencia di Benny Sevinger den Parlamento pero ta cu e voto di Sevinger incluso, Raiz por a alcansa pa contra acuerdo cu su dos asientonan dicidi kende ta bira Presidente di Parlamento.

   Mester conclui pues cu voto di un delincuente, cu ta un persona cu Huez y Corte di Husticia a condena pa un crimen cu ta haci cu e no por participa na eleccion mes, pues Benny Sevinger, a permiti Kamperveen bira Presidente di Parlamento di Aruba.

  Lamentablemente, na momento cu Gobierno Wever-Croes a logra pone Aruba como ehempel pa mundo, presencia di un persona cu Huez a bisa cu no mester ta den Parlamento, cu ta Benny Sevinger, a yuda Raiz cu un dia a cualifica Benny Sevinger como no acceptabel pa un funcion den Parlamento, haya Presidencia di Parlamento.

   Kico ta integridad y respet pa Huez den caso di Sevinger y respet pa acuerdonan manera den caso di Raiz, ta e pregunta grandi!