Hipocrecia politico ta culmina na caminda pa eleccion 2024
- Segun Mike awe Aruba mester ta orguyoso cu e ta paga debe
- CAft y Reino a bisa cu ta debe orguyoso ta exigi refinanciamento
ORANJESTAD (AAN) Uno di e momentonan historico pa Aruba tabata e momento cu Reino Hulandes y hasta e Comision pa Supervisio di Reino a anuncia cu Aruba a logra un bon maneho di placa di Pueblo cu mester haya continuacion.
Den tur e documentonan cu a wordo ricibi riba e materia di maneho financiero di Aruba, ta bini dilanti e sosten pa Gobierno di Aruba cu a sabi di hiba un maneho cu mester wordo continua.
Na momento cu a bira conoci cu Gobierno di Evelyn Wever-Croes a cay, e Gobierno nobo di Hulanda y asina di Reino, a expresa su preocupacion pa e maneho encamina pa Gobierno Wever-Croes haya continuacion.
E preocupacion Hulandes enfrente eleccion di Aruba no ta sin base, teniendo na consideracion cu ta exactamente 10 aña pasa cu Gobierno di Reino a yega Aruba y a baha Mike for di su fortaleza caminda el a bay tene su huelga di hamber enfrente un Aruba, cu asina no por a mira con Mike a traiciona su confiansa y e bienestar nacional.
Den Fort Zoutman e teatro di Mike Eman ora Hulanda a pone fin na su maneho di abuso di placa di Pueblo, Aruba a worde cubri cu berguenza mas ainda ora Mike mester a baha y acepta cu Aruba ta bou supervision Hulandes te awe.
Uno di e motibonan cu a manda Mike Eman cas na 2017 tabata e desaster cu el a crea pa Pueblo di Aruba cu creacion di un debe nacional cu segun su persona mester wordo paga cu honor.
Awe e honor cu cual e debe ta wordo paga ta cu refinanciamento di e 134 Biyon cu prestamo y interes a nifica pa Aruba, cu Mike Eman a pusha den estado di bancarota y a scapa pa motibo di e maneho cu a wordo hiba pa Gobierno Wever-Croes y den cual sigur mester reconoce e experto financiero Ministro Xiomara Maduro.
Pa haya un financiamento a base di e necesidad cu Mike Eman a laga atras, Gobierno Wever-Croes mester a cubri un trayectoria legal, cu awor ta haci posibel pa Aruba por sigui cana na caminda pa un futuro nobo cu ta e trabou di Gabinetenan di Evelyn Wever-Croes cu mester a scapa Aruba for di e desastre economico cu gobernacion Mike Eman a laga atras pa medio di un debe nacional, proyectonan PPP pa no papia mes di e abuso gubernamental di a crea cerca Pueblo e esperansa falso cu e refineria di Nicolas Maduro lo a habri un epoca di oro pa Aruba, cu e maneho bergonzoso di Gobierno Mike Eman riba tur tereno, a laga atras riba tur tereno pa Aruba y generacionnan cu ainda mester bini.
Awe orguyosamente, manera Mike a planea, Gobierno di Aruba mester percura pa Aruba paga su debenan aunke mester aplaudi e forma cu Gobierno Evelyn Wever-Croes a sabi di recuperia economia y situacion financiero di Aruba cu awe conoce reconocimento di henter mundo pa loke Gabinete Wever-Croes a alcansa.
