ORANJESTAD (AAN): Tanto Diabierna como Diasabra anochi, por a mira cu hendenan a yena e poco clubnan nocturno cu tin habri na Palm Beach,
y ta parce cu comosifuera cu tur hende ta contento cu e ‘Samenscholingsverbod’, y aglomeracion riba parkinglot y mas a wordo elimina desde Diamars siman pasa.
Aunke a relaha hopi medida y tambe elimina Toque de Queda, no mester lubida cu pa negoshinan tin keto bay regla cu tin di mantene 1.5 meter di distancia. Negoshinan cu ta ricibi cliente, no mag di tin hende para, ni sinta na e bar. Hendenan cu ta na e negoshi mester ta sinta pa haya servicio, y no por balia.
Sinembargo e videonan cu a circula di loke a pasa Diasabra anochi na Aruba, ta indica cu tur hende a lubida. Tabata parce cu tur cos por sin problema, pa complace e turistanan na monton cu a bin specialmente pa Memorial Day Weekend.
Algun club nocturno no tabatin musico, pero si DJ cu no tabata duna background music, sino volumen halto hisa estilo di ‘concert music’. Ta bon cu e turistanan aki cu a yega, nan tur tabatin un PCR-Test cu ta negativo pa Covid-19. Sinembargo e riesgo pa pone asina hopi hende den un lugar, ta grandi y sigur keto bay ta laga hende cu pensamento cauteloso.
Similar ta loke Polis a topa cune na un Bar & Restaurant na Paradera cu awor a traha un hardin pafo a-la-Bochincha. Autoridad a actua pasobra a bin topa cu monton di hende cu no ta percura pa e 1.5 meter di distancia, cu no ta worry cu no mag di keda para (tur hende mester ta sinta pa haya servicio), y tambe e Bar poni pafo.
Lo mas lamentable ta cu algun hende sin tapaboca tabata cana rond. Tin di corda cu keto bay esey si ta un regla cu ta valido. Ora cu Aruba yega na 85% di hendenan vacuna, e ora posiblemente lo bay elimina e regla ey.
