ORANJESTAD (AAN): Diferente reaccion por a tende den fin di siman, riba e caso tragico cu a socede riba e pida lama entre Andicuri y Natural Brigde.
Hopi a enfoca riba e hecho cu ta tribi di posiblemente conseha turistanan pa bay landa den e pida lama peligroso ey. Autoridad tin di haya sa si acaso ta e Tour Guide mes a sugeri esey, of si acaso e turistanan mes a drenta den lama.
Tin indicacion cu ora cu nan a drenta, cu e lama tabata calmo. Pero den menos di 30 minuut esaki a cambia, y coriente fuerte a dal nan contra baranca.
A ser treci dilanti tambe cu varios di e turistanan cu tabata riba e Tour, ta Nurse di profesion y nan mes tambe a yuda practica CPR riba e dama cu no tabata duna señal di bida mas, y a fayece.
Riba Social Media, un di e turistanan a expresa cu tanto Polis y Personal di Rescate a tarda basta pa yega, y cu ora nan a yega, pa colmo ningun di nan a drenta sikiera den lama.
E NOMBER:
Un monton di reaccion a drenta na DIARIO y otro medionan, riba e uso di nomber “Shark Bay” pa e lugar ey unda e turista a fayece. Algun hende a keda sorprendi cu di un dia pa otro, hende a inventa un nomber nobo pa e lugar ey.
Siendo cu e lugar pa hopi decada su nomber ta ‘Boca di Cruz’.
Awor hasta e relato oficial di Polis a duna informacion cu esaki a socede na Shark Bay, y no a menciona Boca di Cruz.
Imaginabo cu e noticia tragico aki cuminza pasa den canalnan internacional, y ta menciona cu e fayecimento tragico aki a socede na Shark Bay. Esaki so ya caba lo spanta hopi hende. “Aruba tin Shark Bay?” “Aruba lo tin cantidad di tribon anto?”
Unavez cu turistanan haya sa cu un persona a muri na Shark Bay na Aruba, bo por conta cu esey lo trece un domino-effect negativo, y innecesario, pero lo laga e isla su nomber mancha.
