ORANJESTAD(AAN)—Bon gobernacion di un pais democratico, ta directamente mara na e honestidad di tur persona cu ta encarga cu maneho di propiedad di Pueblo.
Kico ta propiedad di Pueblo ta bini directamente dilanti den tareanan di Landsrecherche, e departamento cu ta resorta bou Procurador General y cu mester defende bienestar di Pueblo dor di actua contra tur loke ta contra ley y regla di parti di personanan cu Pueblo ta paga pa traha pa e pais den cualkier posicion of ta encarga cu placa por ehempel di subsidio cu Pueblo ta duna pa sostena trabou di organisacionnan na e pais.
Landsrecherche pues ta Polis special di interesnan di Pueblo, cu mester wordo sirbi a base di Ley y no a base di preferencia pa cualkier motibo cu por tin.
NO POR
ABUSA DI
PROPIEDAD
DI PUEBLO
No ta solamente Gobierno of e aparato gubernamental ta cay bou e teritorio legal den cual Landsrecherche riba orden di Procurador General por start un investigacion penal. Companianan cu pa mas cu 50 porciento ta propiedad di Gobierno, por wordo investiga dor di Landsrecherche y oficialmente persigui dor di Ministerio Publico si nan actua contra ley y regla.
Organisacion cu pa mas cu 50 porciento ta depende di subsidio di Gobierno, pues placa di Pueblo, tambe por wordo investiga dor di Landsrecherche cu ta crea e base pa nan por wordo persigui oficialmente.
Nos sistema democratico ta exigi pa Ministerio Publico ta fuerte para den su zapato prome cu e actua. Esaki ta haci cu e mester percura pa tin tur prueba necesario pa e actua.
Ora resumi e caso Avestruz por mira, con na cierto momento informacion importante cu por tabata tin iregularidad cu otorgamento di tereno di gobierno durante Gobierno Mike Eman, a wordo presenta na Miniserio Publico.
No ta sin mas, ora un persona entrega loke por ta base di un acto contra ley, Ministerio Publico ta drenta den accion.
Aruba ta un Estado di Derecho cu ta nifica cu e aparato gubernamental na tur nivel y tur e ramonan di gobernacion, ta tene nan mes na ley.
Manera ya bisa, Ministerio Publico mester verifica cu e keho ta valido pa perssigui un persona. Ta ora mira un base pa investigacion, ta habri esaki y ta anuncia e caso cu awendia ta haya un nomber popular manera Avestruz.
VERIFICACION
DI ACUSACION
Pa por actua contra un persona a base di un keho, mester di loke ta yama verificacion di e base.
Personal di Landsrecherche mester acumula tur informacion, cu por conduci na e decision pa persigui un persona. Esaki ta haci cu ta evita cu por ehempel documentonan importante ta desaparece y ta confisca tur loke por bira prueba cu Ministerio Publico mester pa persigui un persona.
Ora tin suficiente base pa sospecha un persona di cualkier accion cu por ta contra ley, ta cuminsa cu e detencion di sospechosonan a base di indicacion concreto cu nan por a comete un accion cu ta contra ley.
Manera DIARIO a yega di splica, e peso di sospecha ta dicidi riba e tempo cu un persona ta keda den man di autoridad prome cu e caso wordo trata den Corte di Husticia oficialmente.
Sinembargo, for di e prome momento Huez ta dicidi si por kita libertad di un persona y pa cuanto tempo loke ta nifica cu ta depende di e diferente actonan contra ley cu ta sospecha cu un persona a comete.
Den e caso Averstruz esaki a varia di acto di corupcion, falsedad den escrito, labamento di placa y loke ta wordo describi como “otro actonan contra ley”.
Ora tuma nota di e personanan cu a cay den man di autoridad a perde nan libertad durante investigacion, tabata personanan encarga cu funcionnan den e Ministerionan cu tabata resorta bou Benny Sevinger durante Gobierno Mike Eman.
E grado di detencion ta depende di e peso di su posibel participacion of conocemento di actonan castigabel y asina cada persona a keda den prizon bou detencion preventivo pero tambe den e casonan di mas tempo den “gevangenhouding” como preso.
E PAKETE DI
SOSPECHO
CONTRA
BENNY
Pa esaki tabata posibel, continuamente nan mester a aparece dilanti Huez Comisario, na kende Ministerio Publico mester a entrega prueba cu nan detencion mester a continua na interes di e investigacion.
Sinembargo, e sospechosonan a mantene nan derechonan democratico y asina por ehempel, Leoncita Arends a pidi Corte Superior pa e haya su libertad, loke Corte Superior a nenga.
Despues di algun dia, Huez Comisario a duna su persona tambe libertad temporal, cu otro palabra, te na e momento cu e caso conclui despues di e tratamento den Corte di Husticia, caminda e procedura legal den “Prome Instancia” ta termina.
E decision di Huez Comisario si ta laga un persona den libertad ta directamente conecta cu e necesidad di informacion di parti di e e persona, cu si no tin nada mas pendiente na e momento, por bay cas bou condicion pero semper dispuesto pa sigui colabora den e proceso. Naturalmente e persona sospechoso mester percura tambe pa e tin abogado cu mester cuminsa acumula tur documento y informacion pa atende e caso dilanti Huez.
Den caso di esposa di Benny Sevinger por nota cu el a keda detene pa poco tempo, mescos cu tabata e caso cu secretaria di Benny Sevinger. Den caso di e esposa di Benny Sevinger, e sospecho ta labamento di placa (y otro posibel crimennan) y den caso di e secretaria di Benny Sevinger, e tabata corupcion (y otro posibel crimennan).
E sospechonan contra Benny Sevinger mes ta mucho mas pisa y ta varia di soborno (placa pa fabor), abuso di poder como Ministro, labamento di placa y participacion na un organisacion criminal.
Ta trata pues di actonan sumamente serio den un estado di derecho manera Aruba.
Landsrecherche ta sigui interoga y investiga pa na final entrega nan Proces Verbaal na Procurador General.
E documetonan pues di Landsrecherche ta bira e base oficial pa sospechosonan, cu awor a haya libertad temporal, bira acusado oficial den Corte di Husticia.
Den e tempo cu a keda pa dilanti Huez e caso conclui, e sospechosonan mester abstene di contacto cu cierto personanan y mester sigui coopera cu e investigacion.
