Velvet Zoé Ramos cu exposicion “Afecta cu Distancia” den Cas di Cultura

ORANJESTAD (AAN) – Den un entrevista cu DIARIO, e Historiador di Arte y Curator Independiente local, a elabora riba e exposicion cu tin den Cas di Cultura,

cual ta un e serie “AUA 2021-2022” titula “Afecta cu Distancia”.

 Ana Maria a splica cu esaki ta consisti di cinco exposicion, unda ta bay “show case” artistanan local contemporaneo. E prome exposicion a tuma lugar Diabierna anochi, cual ta di e artista Velvet Zoe Ramos,  y e di dos presentacion lo tuma lugar otro aña, na Januari, cu ta bay tin e otro cuater exposicionnan.

“E meta di e cinco exposicionnan aki ta pa mustra comunidad cu arte ta algo hopi mas cercano na nos, di locual nan ta pensa. E no ta pa un audiencia exclusivo y e exposicion particular aki, tin como tema: ‘Afecta pa e Distancia’. E exposicion aki, en particular, tin tema manera con nos ta reacciona nos mes cu otro persona; empatia. Con nos ta reacciona nos mes ora nos ta wak imagennan di sufrimento, pero envez di confronta e audiencia cu e imagennan aki, nos a haci pa medio di obranan hopi mas conceptual, unda e mensahe ta locual mas ta resalta, envez di wak imagen violento”, Ana Maria Hernandez a detaya.

E exposicion aki ta habri pa publico for di Diasabra cu a pasa te dia 21 di September. Despues di Januari te Februari tin e di dos, y asina lo sigui cu e otro cuater exposicionnan.

E artista visual Velvet Zoé Ramos di su parti, a splica cu esaki ta su prome exposicion individual, y el a wordo invita pa Ana Maria Hernandez pa e mustra su obra for di comienzo di su carera; e tin un seleccion di obranan cu ta data desde 10 aña pasa te awo.  E tin obranan cu ya a wordo presenta na Atelier’89 pero tin otronan cu nunca a wordo expone, ya cu e tabata na London unda el a studia y biba.

“Awo mi ta mustrando e obranan den un reflexion nobo, cu tin mas di haber cu Aruba, Caribe, Latinoamerica y con e ta wordo sinti akinan en comparacion cu ora mi tabata biba na London. E ta manera un combersacion entre lo que antes tabata, y loke awo ta”, e hoben a splica.

El a extende un invitacion na e publico en general pa observa e diferente obranan.