Varios team deportivo recordando bida di Jossy Tromp kende a fayece recien

ORANJESTAD (AAN): Tabata dos siman pasa cu e noticia tristo a drenta cu Ignacio José Tromp a fayece, cu 79 aña di edad.  Pa hopi hende e ta simplemente conoci como ‘Jossy’ of tambe ‘Jossy Polis’.

   E tabata conoci como un agente policial hecho y derecho, cu tabata semper cla pa mustra hobennan tur loke tin di haber cu respet.  Pesey mes hobennan cu tabata comete actonan baldadi, mesora ta para straight ora nan mira cu Jossy Polis ta yegando den patruya.  E ta alavez papia cu nan, y empuha nan pa escoge un rumbo mas sano, incluyendo deporte.

   Naci den bario di Companashi, for di edad hoben caba Jossy tabata envolvi activamente den hopi tipo di deporte.  Pero claramente esnan cu mas a conquista su curazon tabata Futbol y tambe Volleyball.

   Esey ta loke Aruba Volleyball Association a trece dilanti tambe, esta cu nan a keda cu bon recuerdonan ta keda atras di Jossy Tromp, kende a yega di fungi como ex-President y Referee di e Asociacion di Volley.

   Te cu e dia di awe, den seno di Aruba Volleyball Association sigur e nomber di “Jossy” na hopi ocasion ta wordo menciona cu un anecdota den e mundo di volleyball riba e isla.  Ta grato recuerdo cu el a dedica parti di su bida na su deporte di volleyball.  Jossy Tromp a forma parti di directiva y despues como Presidente di Aruba Volleyball Association.

   Como Presidente sr. Jossy Tromp a maneha y guia e organizacion di A.V.A. y el a duna su aporte na e desaroyo di volleyball en general.  Fuera di esey, Jossy Tromp tabata conoci como Arbitro di Volleyball. E tabata fungi como Referee tanto pa weganan ‘Indoor Volleyball’ como ‘Beach Volleyball’. Sr. Jossy Tromp tabata dirigi/fluit su weganan corecto y e tabata mantene e reglanan local y internacional cu a wordo dicta pa competencianan di volleyball.

   Jossy Tromp semper a tuma su trabao como Arbitro hopi na serio y tanto e atletanan como e coachnan ta consciente di esaki. Den su carera como Arbitro di Volleyball sr. Jossy Tromp a pasa su conocimento di referee na e hobennan kendenan el a siña pa ta un referee di volleyball, con pa fluit un wega cu su reglanan, postura y señalnan.

   Pa e parti di beach volleyball, sr. Jossy Tromp tabata co-fundador y ela sa di guia e hobennan di e tempo aya con pa hunga beach volleyball y siña nan e reglanan di beach volleyball. Ultimo añanan cu e tabata activo ainda sr. Jossy Tromp semper ta acudi na weganan di volleyball tanto indoor como beach volleyball. “Weganan di Volleyball tabata su pasion”.

   Su otro amor tabata pa Futbol, y aki e tabata activamente envolvi tambe cu e organizacion di SV RCA, y ultimo añanan bo ta mire regularmente na RCA Arena na Solito ta mira wega, y combersa cu amigonan di bario.  Ora tin wega grandi na Stadion, e tey tambe anto bisti cu su paña tricolor pa demostra su sosten.

   Palabranan di condolencia na henter famia y amigonan.  Siman pasa Diamars, ya caba famianan a despedi di dje na funeraria.