Varios preocupacion treci dilanti durante 'town hall meeting' di KvK tocante reforma fiscal

ORANJESTAD (AAN): Riba 2 di Juni Camara di Comercio (KvK) a tene un 'town hall meeting',

pa papia tocante e reforma fiscal cu Gobierno ta bin cune, cu ta inclui introduccion di BTW.

Durante un conferencia di prensa Dialuna, presidente di KvK Monica Kock a indica cu el a keda hopi contento cu e acogida.

El a splica cu ya caba KvK a entrega na Gobierno por escrito su pensamentonan tocante e reforma fiscal.

“Nos ta haye importante pa tur hende den comunidad y comercio haya un chens tambe pa nan por vocifera kico nan opinion ta riba e reforma fiscal y e consecuencia di esey”.

Nos a keda contento cu e sala pa e town hall meeting tabata hopi yen y cu nos a haya varios pregunta y comentario, segun Kock.

El a sigui bisa cu locual cu KvK a trece dilanti ta informacion cu nan a ricibi for di Gobierno.

Un di e puntonan cu hendenan den e town hall meeting a presenta tabata cu na final nan lo no por carga e reforma fiscal  (BTW) aki financieramente.

“E punto aki tabata mas tanto cu ora cu bo importa bo producto bo tin cu bay paga e BTW na e entrada caba y e ora ey bo tin cu bay bende”.

Nan opinion tabata cu e termino entre e momento cu nan ta bay cumpra e producto y despues bay bende ta hopi largo y esey ta pone cu e compania mester bay busca un linea di credito, pa nan por paga e BTW na e entrada na Aruba.

Hopi di e hendenan presente a bisa cu nan no por afford e pida ey, segun e presidente di KvK.

Otro punto cu e personanan a trece dilanti ta cu e cambionan cu introduccion di BTW ta bay trece ta bin cu mas gastonan administrativo, mirando cu por papia di un asina yama dobel tarifa.

Segun Kock, otro punto ta cu e comerciantenan tin cu bay haci adaptacionnan pa loke ta software.

Tambe nan a trece dilanti cu e salario minimo cu Gobierno kier pone na 5000 florin pa doño di un compania, ta un salario cu nan no por carga.