ORANJESTAD (AAN): E hospitalnan di Aruba, Corsou, Sint-Maarten y Caribe Hulandes oficialmente a instala e cooperacion cu ta hiba e nomber di Dutch Caribbean Hospital Alliance (DHCA).
E momento ameno aki a tuma luga na Aruba di 20 te cu 24 juni durante e Vierlanden overleg.
Durante e encuentro aki a participa tur ministerio di salud, seguronan medico y e hospitalnan di e islanan CAS-BES. Topico durante e encuentro aki tabata e colaboracion riba tereno di salud publico dentro di Reino.
E experiencia durante Covid-19 tabata e motibo directo pa establece lasonan di colaboracion. DCHA tin como meta pa reforsa e calidad di cuido di e hospitalnan riba e islanan aki. DCHA kier por garantisa y mehora e cuido medico specialisa den futuro y optimalisa y sincronisa e disponibilidad di cuido medico specialisa.
Meta di Dutch Caribbean Hospital Alliance (DCHA) ta pa ofrece e miho cuido medico local y regional pa medio di tin un colaboracion solido entre e paisnan den Reino y partnernan strategico. E bienestar di nos pashent y empleadonan ta primordial, ademas di mantene un situacion finaniero-economico saludabel y salvaguardia nos balornan cultural.
Directiva di e cuater paisnan den Reino a expresa nan confiansa den e intensificacion di cooperacion entre e hospitalnan y cu esaki lo mehora y reforsa e calidad y continuidad di cuido pe habitantenan di e islanan Caribense di Reino Hulandes.
Giovanni Frans, director di Fundacion Mariadal y presidente actual ta expresa: “Despues di casi dos aña di preparacion y reunionnan intensivo, entre nos mes y hunto cu e cuater paisnan, finalmente DCHA ta un hecho. Nos ta orguyoso di e paso aki y nos ta spera cu esaki ta un di hopi mas cu lo ta na fabor di un servicio di salud optimal riba nos islanan.”
Ingemar Merkies, director medico di CMC: “Un logro cu a wordo realisa door di empeño di hopi. Gradicido p’esaki. Mi expectativa ta cu hunto cu DCHA lo traha riba tereno di formacion y educacion cu meta entre otro pa trece nos ‘ human capital’ bek cu ta den exterior. Esaki lo sigui mehora e calidad di cuido riba nos islanan.”
Felix Holiday, bestuurder van SMMC: “Esaki ta un bunita paso padilanti y nos ta mira cu un colaboracion mas intensivo entre e otro islanan ya caba a duna su fruto durante e cuido di Covid. Esaki mirando cu nos ta yega na otro mas lihe, ta yuda otro y ta mantene otro na altura di e ultimo desaroyonan.”
Jacco Vroegop, director medico y general di HOH: “Establecimento di e cooperacion ta un paso chikito realisa pa un grupo di hende motiva di e islanan y Hulanda. Importante awo ta pa inspira otro y sigui construi un team pa asina no solamente keda cerca di otro pero sigur logra mas exito. Esencial ta pa no perde bista di ken ta central den esaki, esta nos comunidad y nos empleadonan.”
Potret adhunto ta DCHA durante e ‘summit’ na Aruba
Recientemente DCHA a demostra su balor di existencia door di introduci e programa escolar Caribbean Health Academy (CARIBHA) na unda 100 enfermero di Aruba, Corsou, Boneiro, St. Maarten y St. Eustatius a wordo educa riba tereno Cuido Agudo Basico. Pa medio di e programa escolar aki y otro actividadnan di DCHA e islanan ta mas flexibel y por responde adecuadamente den situacionnan agudo den cuido, por ehempel durante un pandemia.
