ORANJESTAD (AAN): E Instituto Nacional di Malesanan Transmisibel di Zuid Africa (NICD), a anuncia e identificacion di variante nobo di coronavirus hopi mutante,
detecta originalmente na e pais aki, aunke tambe a haye den otro paisnan.
E variante, denomina C.1.2, a wordo identifica pa prome biaha na Mei den dos provincia sudafricano, Gauteng (unda ta ubica Johannesburgo y e capital, Pretoria) y e bisiña Mpumalanga, aunke el a wordo descubri den e nuebe provincianan di e pais austral.
E C.1.2, cu a wordo haya tambe na New Zeeland, Mauricio, Portugal of Suiza, ta comparti algun mutacion cu otro variantenan, manera esun Delta (originario di India) of Beta (cu a surgi aña pasa na Zuid Africa), pero ta presenta otronan unico.
Segun a indica dialuna den un rueda di prensa virtual e cientifico NICD, Cathrine Scheepers, e variante nobo ta presenta " te hasta 59 mutacion, cu ta hopi" si ta tuma na cuenta cu e otro variante tin "rond di 25".
Di momento, y apesar di su capacidad di mutacion, e C.1.2 no ta ni un "variante preocupante" ni un "variante di interes", segun e criterio clasificatorio di e Organizacion Mundial di Salud (WHO/OMS), pasobra a wordo detecta cu un "frecuencia abao", a splica den e rueda di prensa virtual doctor Jinal Bhiman, di NICD.
Riba si variante nobo ta mas contagioso cu e otronan, Scheepers a responde: "Aworaki mes nos no sa", pues e cientificonan ta sigui haci experimentonan pa averigua mas di dje.
"Segun nos conocimento di e mutacionnan den e variante aki, nos ta sospecha cu lo por evadi parcialmente e respuesta immune, pero apesar di esey, e vacunanan lo sigui ofrece nivelnan halto di proteccion contra e hospitalizacion y morto", a subraya e Instituto Nacional di Enfermedadnan Transmisibel den un comunicado.
Profesor Adrian Puren, di NICD, a subraya den e rueda di prensa cu e vacunanan usa actualmente na Zuid Africa, como esunnan di e empresas Johnson & Johnson y Pfizer, a resulta "efectivo" contra C.1.2, pa locual no tin motivo pa bay den "panico".
"E pandemia na Zui Africa ta sigui wordo domina pa e variante delta", hopi contagioso, den e di tres ola di covid-19 cu ta sufri e pais africano, profesor Penny Moore a remarca.
"Nos ta spera cu ta bay sigui surgi variantenan nobo na cualkier caminda unda tin presencia di e virus. E vacunacion ta sigui fundamental pa proteha e personanan di nos comunidadnan cu alto riesgo di hospitalizacion y morto, pa reduci e tension den e sistema di salud y pa yuda retrasa e contagionan", NICD a insisti.
E vacunacion, a agrega, mester wordo combina cu e demas medidanan social y di salud publico, como un bon ventilacion den espacionan comparti, e uso di tapaboca, e labamento di man y e desinfeccion di superficienan cu regularidad y e mantenimento di un distancia di meter y mey mas tanto cu ta posible.
Te cu awe, Zuid Africa, ta sigui como e epicentro di e pandemia na Africa cu mas di un tercio di e contagionan continental, unda a registra algo mas cu 2,7 miyon caso di covid-19, di cual 81.830 a caba den fayecimento.
E país, di momento, a vacuna mas di 12 miyon persona di un poblacion di 58 miyon habitante.
