Sharleen Tromp mirando hopi desaroyo tumando luga durante e siman di “Discover Your Potential”

ORANJESTAD (AAN): Recientemente e programa “Discover Your Potential” diseña pa Entrenado Certifica di Personalidad, Fundado di CrossRoad, como tambe Docente di hobennan di examenklas, Señora Sharleen Tromp,

a tuma luga cu participacion di 18 hoben kende nan tabata tin un tremendo siman cu material di hopi enseñansa, ekipamento y discubri identidad.

   E fundado di e plataforma CrossRoad, kende tin un pasion pa yuda hobennan tuma e caminda corecto segun nan personalidad unico y mira nan desaroya den cada area di nan bida a lansa e programa den un momento crucial den e grupo di hobennan aki nan bida.

   “Si e tabata strategicamente planea pa atende cu e grupo aki durante e temporada di zomer vakantie, mirando e tempo crucial di nan bida pa loke ta trata clausura di un temporada y inicio di e temporada nobo cu e hobennan ta drentando,” Señora Sharleen Tromp a splica DIARIO.

   “Manera menciona anteriormente, no tin nada mas frustrante pa scoge un estudio sin sa si esaki ta pas cu bo y ta parti di bo proposito, pero mas cerca posibel nos cana den e caminda corecto mas util un ser humano ta sinti’e. Dus si, esaki tabata un siman strategico y mi ta orguyoso di wak con tur hoben a participa na cada momento y cu hopi animo pa descubri mas di nan mes.”

   Temanan cu e hobennan a siña ta entre otro “The Art of Student Budgetting, Personal Branding, Personalities, Talents Discoverment, Entrepreneurship, Health Wellbeing: eat smart, think smart y Importance of following Instructions, Communicate and Delegate as a team.”

   Hoben participante, Kaithlyn Perez a keda hopi contento di a participa na e programa, “Mi ta un hende cu ta gusta lidera otronan pa yuda nan desaroya y ora mi a wak e flyer mi a registra mes ora. Mi a drenta cu un open-mind y e material cu mi a ricibi a yuda mi masha hopi mes. Loke mi a gusta masha hopi tabata e parti di personal branding pasobra el a siña mi cu mi ta un brand y el a siña mi cu mi mester ta conciente di con mi ta comporta mi mes y e impacto cu esaki por tin den futuro. Mi a ricibi hopi claridad na loke mi kier bira den futuro como mi profesion, dus el a echt yuda mi den esey. Mi lo desea haya mas di e tipo di material aki y mi ta contento cu nos por a palabra cu Juffrouw Sharleen cu nos lo keda reuni un biaha pa luna.”

   Segun hoben participante, Muzilain Pourier e tambe a keda hopi satisfecho cu su participacion na e programa, “Mi a keda hopi feliz y satisfecho cu e camp aki paso tur loke mi a pensa den e principio ta loke mi a siña y mas. Loke mi a echt gusta tabata e parti di Personal Branding, Budgeting, Wishes, Goals y Personality. E lo yuda mi bende mi brand, presupuesta y formula metanan di manera cu mi por completa nan mas lihe. el a sigura mi ken ami ta, kico mi gusta y kico mi no gusta.”

   “Tambe el a trece claridad den loke mi kier studia, cu ta bira un cirugano. Danki na e programa mi a cera amistadnan nobo cu e otro hobennan participante, como tambe e facilitadonan cu mi lo kier sigui mantene pasobra mi ta hopi interesa den sigui siña mas - mi no sa exactamente over di kico - pero mi lo kier sigui siña si. E programma tabata hopi impactante y fun  alavez, y mi ta recomenda e programa na otro hobennan paso mayoria hoben awendia no sa ken nan ta y e programma aki lo  yuda nan conoce nan mes miho.”

   “Na comienso mi a spera cu atraves di e programa lo mi conoce mi mes y boost mi potencial pero mi a termina di haya sa mas di loke mi a spera,” hoben participante Alexander Gamez a comparti. “Locual mi a gusta mas tabata conoce mi temperament, mi debilidadnan como tambe mi puntonan fuerte, tambe mi a gusta e parti di entrepreneurship pasobra un dia mi kier habri mi propio negoshi y tambe e parti di nutricion.”

   “E nutricionista a siña mi hopi y a aclarea hopi duda cu mi tabata tin di mi curpa pasobra mi ta sufri di sucu. Mi a gusta tur cos, pero esakinan mi a gusta mas. Ami kier sigui mehora mi temperamento y ta recomenda e programa aki na tur hende, pasobra awendia hopi hende no sa ken nan ta, kico nan kier den bida y e programa aki ta yuda bo descubri esaki.”

   “Esaki ta un edad unda hobennan mester ta lo mas tanto posibel estableci den nan identidad y nan tipo di personalidad unico pasobra claridad den esaki ta yuda nan tuma e decisionnan mas preciso posibel pa cu nan futuro. Pa fin di e luna aki, nos lo reuni pa entrega certificado na tur participante.”

   “E reaccion di e hobennan tabata tremendo y mi por a mira hopi desaroyo tuma luga durante e siman di “Discover Your Potential. Un biaha mas danki na companianan enfoca riba Aruba su futuro generacionnan, e hobennan selecciona, a haya oportunidad pa ricibi e materia aki completamente gratuito.” e Experto di Personalidad, Señora Sharleen Tromp a termina bisando.