USGS a duna update di e localidad nobo di epicentro di temblor devastador di Venezuela

Analisis nobo a produci resultado aki

• E ta den lama hopi cerca di La Guaira mes 

ORANJESTAD (AAN): Siman pasa e servicio di United States Geological Service a dicidi na emiti un ‘update’ riba e temblor fuerte y devastador cu a socede Diaranson 24 di Juni 2026 na Venezuela.

   E update aki a bin despues cu a haci un analisis mas refina, uzando hopi mas data cu nan a ricibi na nan disposicion.   Segun e expertonan di USGS, esaki a pone cu a logra determina un epicentro mucho mas corecto pa e temblor devastador aki.

   Epicentro corecto: Tabatin dos temblor tras di otro, e prome nan ta yama ‘foreshock’ cu ta uno fuerte di 7.2º riba Scala di Richter, y el a socede 30 seconde prome cu e ‘mainshock’ grandi di magnitud 7.5º riba Scala di Richter.

   E epicentro corecto di e temblor devastador aki a bira 10.622º Nort y 67.194º West.  E tabatin un profundidad hopi superficial di apenas 10 km bao subsuelo di lama.

   Esey nifica cu e epicentro mes no tabata bao tera na estado Yaracuy, pero mas bien 17 km west di Catia La Mar na Venezuela.

   E geologo venezolano, ingeniero Luirama Salazar a confirma cu Servicio Geologico di Merca (USGS) a update e epicentro di e temblor di 7.5º, y e tabata mas bien dilanti e costa central di Venezuela, y esaki ta pone cientificonan compronde mihor e secuencia sismico cu a afecta e pais.

   E update di USGS a socede Diamars 28 di Juli 2026, y ta contene detaye mas preciso di e epicenter, hunto cu mapanan di intensidadnan microsismico, isosista, y e contexto di sismotectonico regional.  Segun e ingeniero, e localidad nobo ta resulta di ta consistente cu e magnitud di daño registra na La Guaira y e demas zonanan di e region central.

   Prome temblor a ‘tapa’ olanan di e otro:  El a splica cu USGS a bisa cu e incertidumbre a bin debi cu e temblor grandi aki di 7.5º, “ a wordo tapa” door di olanan sismico di e temblor prome cu ne di 7.2º cu a socede 30 seconde prome.  E tapamento aki a stroba algun sismogram di detecta mas detaye.

   Segun Salazar, e update aki ta inclui un elemento importante pa re-intrerpreta e geometria di e kiebro (‘ruptura di tera’) y a bisa cu e evidencia disponibel awor ta cuminza bira mas compatibel cu un “ruptura multi-focal complica”, unda cu varios segmento di e mesun sistema di fayo platonico a participa den un secuencia rapido di libera energia, envez di e dos temblornan completamente independiente.

   No obstante, e specialista a aclara cu e splicacion aki ta sigui di ta un hipotesis di trabao ainda, y tin di wordo analisa hunto cu estudionan adicional, entre nan modelonan di ruptura finito, relocaliza hipocentralnan di high resolution, datonan geodesico, y demas investigacionnan cu ta sigui di ta tumando lugar.  Den e sentido aki, e ingeniero Salazar ta considera cu e update di USGS ta representa un avance pa compronde e dinamica di e temblor cu a sacudi Venezuela y a ocasiona mas di 5.000 morto, miles hende perdi, y basha edificionan lagando mas di 2.1 miyon ton di ruina atras.