Sosten financiero pa Pasa Dia den Bario di Gruponan di Adulto Mayor

ORANJESTAD (AAN): Cu grato placer Fundacion Movemento ta Bida (FMtB) ta informa cu a ricibi for di Gobierno di Aruba un subsidio

pa sostene e funcionamento di e Gruponan (Pasa Dia) di Adulto Mayor, den diferente distrito di Aruba, kendenan ta reuni periodicamente pa socialisa, recreaccional y desaroyo personal.

   E peticion pa subsidio pa e proyecto Pasa dia den Bario, a wordo recientemente aproba. E proceso a bay den deliberacion estrecho y colaboracion cu e Departamento di Adulto Mayor y Minister Mervin Wyatt-Ras di Salubridad, Asuntonan Social, Asuntonan di Adulto Mayor y di adiccion.

   Un proceso a base di basta reunion, entrega di varios documento relevante, e.o. relato financiero, relato anual di actividad di FMtB, presentacionnan y tur loke mester a haci pa yega hunto na un subsidio hopi importante pa nos adulto mayor cu semanalmente tin caminda di bay pa socialisa.  Asina nan ta haya informacion ariba topiconan actual of legal, haci diferente ehercicio, p.e. baile, terapia, fysiofit, bebe koffie hunto y combersa... y asina nos por nombra mas actividad cu ta varia y ta recreativo.

   FMtB tin informacion y contacto cu 32 grupo di Adulto Mayor activo na Aruba. E gruponan den contacto cu FMtB tin un cantidad di miembro cu ta varia entre 5 pa 66 persona. Total di 22 grupo a logra di registra y participa na un presentacion cu FMtB a organiza na Expozaal di Cas di Cultura riba Diaranson dia 29 di juli. Total tabata presente 31 boluntario y lidernan di e respectivo gruponan di adulto mayor.

   Cuater miembro di directiva di FMtB a guia e presentacion. E informacion cu a presenta tabata hopi importante, pasobra mester a splica e proceso con cada grupo por aplica pa e sosten financiero, ademasdi stipulacion, condicion y obligacionnan pa bin na remarca pa e sosten financiero y con pa responsabilisa pa esaki. Hopi pregunta a wordo lansa y contesta. Despues a splica tambe e contenido di e combenio (‘toekennings overeenkomst’) cu FMtB den cuadro di e proyecto aki.

   Na final por a formalisa di biaha e peticion pa sosten financiero. Den total 14 grupo a haci esaki: HoneyBees, Grupo Sunshine 60+, Sigui Move Bubali 60+, Curason Jong, Flor Bon Bini, Grupo Uni, Grupo Adulto Activo Piedra Plat, Happy Hearts, Grupo Tera y laman, Grupo Savanah, Samen Oud Savaneta, Flor di Brazil, Grupo Flor di Aloë, Grupo Flor di Lely. Falta algun mas pa consulta cu nan miembronan prome cu nan entrega nan peticion formalmente.

   Tambe FMtB lo follow-up cu e otro gruponan cu no a logra participa na e reunion menciona. P’asina pronto nan tambe ricibi tur informacion necesario pa por disfruta di e sosten financiero di parti di gobierno. Locual ariba su mes ta un reconocimento di e importancia di nan trabao y actividadnan pa e poblacion di adulto mayor.

   Si bo tin bo mesun grupo of ta desea di haya guia con pa cuminsa cu un grupo, tuma contacto cu nan na: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.  y nan oficina ta na edificio IBiSA, Frankrijkstraat 1 na Eagle, of por yama 594-2546 pa papia cu  Rudy Leysner.

   Pa finalisa, e logro aki pa e gruponan di adulto mayor ta un muestra di bon colaboracion y cu union ta haci forsa. Na nomber di tur grupo di adulto mayor y FMtB, danki un vez mas na nos Minister Señora Mervin Wyatt-Ras, di Salubridad, Asuntonan Social, Asuntonan di Adulto Mayor y di adiccion y tambe na Desiree Helder di Directie Ouderenzaken.