Durante luna di februari
ORANJESTAD (AAN): Minister Dangui Oduber kier a informa cu entrante mañan, 2 di februari, e Unidad Mobiel di Vacunacion ta cuminsa su recorido rond Aruba. Pa e 2 prome simannan di februari e lo ta staciona na e parking lot di Centro Deportivo Frans Figaroa (Noord) y pa e 2 ultimo simannan di februari e lo ta na parking lot di Centro di Bario Playa Pabou.
Na e Unidad Mobiel tur persona cuminsando for di 12 aña por ricibi nan prome of di dos dosis vacuna y personanan cuminsando for di 18 aña por ricibi nan prome, di dos of e boostershot. E vacuna cu ta disponibel riba e Unidad Mobiel ta unicamente Pfizer.
Minister Dangui Oduber ta invita e pueblo di Noord, Playa Pabou y becindario pa haci uso di e dianan aki pa ainda pasa busca nan vacuna Pfizer.
E mandatario a indica, "mi ta sinti asina contento y orguyoso cu Aruba a responde na e yamada pa vacuna y nos ta sintiendo e resultado di esaki. Aruba ta bayendo den bon direccion, casonan ta bahando, cantidad di persona hospitalisa ta bahando, menos hende fayeciendo y nos turismo recuperando".
