Realidad mundial ta confirma cu Putin casi a bira “Amigo para Siempre” --- *Friend den Parlamento mester presenta cu family dilanti Mesa Berde --- *Aruba casi a bira Centro Recreacional Rosneft, Maduro & Friends
ORANJESTAD(AAN)—Cu Aruba, como parti di mundo, ta pasa den un tempo sumamente dificil, tur hende cu sano huicio mester sa.
Na e momento aki politica barata ta manera sonido di cabaret barata den hanchi bandona.
Ta na e momento aki, Arthur Dowers a considera oportuno pa bin lansa asunto di “Family & Friends” pa score politicamente cu e speransa cu prome cu e baha cu pensioen hunto, e haya oportunidad di campa atrobe hunto cu su famia politico den oficina di Gobierno.
E momento cu AVP sin duda a fracasa, tabata na 2017 ora Mike Eman mes a yega na e conclusion cu su tempo a yega pa retira.
Mike Eman a splica cu Pueblo a papia palabra cla aunke no tabata Pueblo so, pero Gobierno di Reino tambe, cu a duna Mike un “Dikke Nul” y pa scapa placa di Aruba a pone Aruba bou supervision Hulandes.
AVP tin algun hende cu bon preparacion y aparente textura pa por goberna, pero pa un motibo of otro nan no ta haya oportunidad pa presenta nan sirbishi.
E grupito di Mike & Mike, annex back to back Benny Sevinger cum suis, a mantene gara riba AVP cu a habri porta pa algun nobato cu aparentemente a tira anker den bahia cu Hulanda a descualifica.
AVP tabata tin oportunidad pa remedia su fracaso di 2017, sigur ora rapportnan hopi serio a cuminsa subi mesa pa confirma kico a pasa cu Aruba cu a bay bancarota. Si Aruba no tabata den estado di bancarota ora Hulanda a bati na porta, Statuut no a permiti Hulanda di drenta.
Loke a pasa ta, cu Hulanda a duna Aruba oportunidad di bandona e situacion di bancarota cu Gobierno Mike Eman a laga atras hunto cu e herencia di casonan penal cu a resulta dilanti Mesa Berde.
Arthur Dowers tin hopi curashi pa papia awe, despues cu a realidad mundial a entrega Aruba e prueba cu e “friends” di AVP na cual Gobierno Mike Eman tabata kier entrega Aruba, ta wordo encabesa pa Vladimir Putin.
E proyecto di Citgo awe ta habri porta pa splica Aruba con Aruba a scapa cu e amigonan di Gobierno Mike Eman no a haya chens di establece na Aruba manera nan tabata kier cou e capa di “Citgo”.
Si Citgo a logra, awe Vladimir Putin, den compania di su hendenan di confiansa Nicolas Maduro, e grupo di heredero di Fidel Castro, por bebe cofi den e Penthouse di Mike Eman hunto cu Astrubel Chavez cu lo a bira dirigente di “Cosa Nostra Ruso” na Aruba.
Ora Arthur Dowers a papia di Friends &Family, el a presenta na Aruba su familia politico cu a percura pa ruman Benny Sevinger como Miembro di Parlamento di Aruba, mester bay splica Huez den caso penal e siman aki kico Friends a haci y pakico e ta wordo persigui pa un Avestruz cu ta puntra kico a pasa cu terenonan di Aruba.
Si ainda Arthur Dowers kier sigui habri boca, e mester pidi Ministerio Publico pa permiti su persona tuma nota di e Rapport di Refineria di Aruba, cu ta duna un bista kico Friends and Family di Mike Eman a haci cu e oportunidad cu nan a haya cu e proyecto Citgo di Rosneft, di Vladimir Putin.
Nicolas Maduro mester a pone placa riba mesa cu e tabata saca for di Citgo, mientras na Venezuela mes ta placa di Rusia tabata subi mesa y drenta caha di placa di Regimen Maduro.
Ora Arthur Dowers papia di Family & Friends awe, e mester tene na consideracion, cu cualkier momento barco di guera cu Putin y Maduro na bordo, por presenta dilanti costa di Aruba pa gosa di un coffi den Pentouse cerca nan amigo Mike Eman, cu ainda mester splica kico a pasa cu entre otro supuesto holoshi Rolex cu lo a yega for di e Cabay di Troje di Rusia na Merca, Citgo, cu Mike kier a haci baluarte economico di Aruba.
