UNESCO-Aruba di bishita na Hulanda den cuadro di e Programa di Educacion di Cultura y Arte

ORANJESTAD (AAN): Den cuadro di Educacion cultural, participacion y accesibilidad na arte y cultura,

LKCA (Landelijk Kennisinstituut Cultuureducatie en Amateurkunst) hunto cu OCenW (Ministerio di Enseñansa, Cultura y Ciencia di Hulanda) a invita tur miembro di Grupo di Trabao pa Educacion di Cultura y Arte den Reino Hulandes, pa participa na un siman di trabao di orientacion na Hulanda.

   Ruby Eckmeyer kende ta specialista di cultura na secretariado di UNESCO-Aruba y tambe presidente di e Grupo di Trabao aki, hunto cu Dyantha Maduro, docente di baile na IPA y miembro di Comision Nacional di Cultura y Arte di Aruba, a representa Aruba. FCP (Fonds voor Cultuur Participatie) a subisidia e siman di orientacion aki pa representante di tur e islanan di Caribe Hulandes por a participa.

   Na Hulanda e Centro di Conocimento LKCA tin mas di 20 aña di experiencia trahando tanto cu scol como cu organizacionnan no-Gobernamental (NGO’s) mientras cu LKCA tambe ta forma parti di e Grupo di Trabao di Educacion di Cultura y Arte. LKCA tin como meta pa sostene tur loke ta educacion cultural, participacion na tur loke ta cultura y arte y pa haci organizacionnan cultural y di arte mas accesibel pa publico.

   E Grupo di Trabao a participa tambe na un conferencia ‘Cultuur met Kwaliteit - CmK’, cu FCP hunto cu LKCA a organiza, pa tur persona di contacto entre un scol y un organizacion cultural na Hulanda, e asina yama CmK-er. Na e conferencia aki representantenan di Aruba, hunto cu representantenan di Sint Maarten a duna un presentacion. UNESCO-Aruba a duna informacion riba e Programa y Framework di Culture and Arts Education (CAE) di UNESCO. Sint Maarten a duna informacion riba tur loke nan ta haci na St. Maarten den cuadro di educacion di cultura y arte riba nivel di educacion no-formal.

   Na e prome Conferencia Intergubernamental cu UNESCO a organiza na 1998, pa haci un peticion na henter mundo pa formula maneho di cultura pa nan país, UNESCO a pidi tambe pa reconoce cultura y arte como un dimension fundamental di educacion. Na e di dos conferencia MONDIACULT, a haci un peticion na tur pais-miembro pa duna educacion cultural riba nivel di e educacion formal, no-formal y informal. Educacion formal ta tur loke ta tuma luga den scol, educacion no-formal ta loke ta tuma luga pafo di scol organiza pa un instancia of institucion, y educacion informal ta loke ta tuma luga entre otro den famia, na cas, riba caya etc.

   Na 2006 y 2010 UNESCO a organiza un Conferencia Mundial di Educacion di Arte y na 2011 UNESCO a proclama un siman den luna di mei como e Siman Internacional di Educacion di Arte. Actualmente UNESCO ta reformulando e Framework di Educacion di Cultura y Arte (CAE), basa riba varios consulta cu nan a tene rond mundo.

   UNESCO-Aruba a participa den e consulta di Region Caribe y e consulta Internacional cu Comisionnan Nacional pa UNESCO.

   Riba nivel di Reino Hulandes, desde 2021 e Ministernan di e paisnan Aruba, Curaçao, Sint Maarten y Hulanda a forma e Grupo di Trabao pa Educacion di Cultura y Arte (CAE). Regularmente e representante di e 4 paisnan hunto cu e islanan di Bonaire, Saba y St. Eustatius ta reuni online, pa asina palabra con lo bay traha hunto riba nivel di Educacion di Cultura y Arte den tur e comunidadnan cu ta forma parti di Reino Hulandes. Desaroyo di Educacion di Cultura y Arte ta forma parti importante di e desaroyo di un ser humano, na su bienestar personal y den su bida diario. Pa e motibo aki ta importante pa crea un infrastructura pa Educacion di Cultura y Arte, cu ta duradero pa nos futuro generacionnan.

   Riba e potret por mira representante di e paisnan Aruba, Curaçao, Sint Maarten y Hulanda, hunto cu representante di e islanan Bonaire, Saba y St. Eustatius.

   Tambe por mira Dyantha Maduro, docente di baile na IPA y Ruby Eckmeyer, specialista di cultura na Secretariado di UNESCO-Aruba, a representa Aruba na e Conferencia ‘Cultura y Calidad’.