Rubin Ponson
ORANJESTAD (AAN); E ta algo henter aña cu cada biaha ta bin den mente di tanto autoridadnan policial y tambe di esnan di DOW: “Acaso tin klapchi cu ta keda scondi algun caminda insigur rond di Aruba?”
Rubin Ponson kende ta Hefe di Departamento di Explosivo di DOW a splica cu ta conoci, si acaso autoridadnan local descubri cu sea un negoshi of un hende particular tin un stock grandi di klapchi warda na un lugar ilegal, esey automaticamente nifica cu nan ta den problema cu husticia.
Segun splicacion di Ponson, na comienso di aña ora cu nan ricibi klapchinan cu a keda sin wordo bendi, bek na deposito di Wela, nan ta haci control riba e fecha cu tin poni riba e klapchi. Si acaso e fecha ta poni cu e ta vence pa wordo bendi siguiente aña, esey ta pone cu di biaha nan ta saca e mercancia ey for di circulacion.
Pues loke tin warda aworaki na Wela ta klapchnan recien (di aña pasa) y cu segun e fabricante ainda por wordo bendi awor na December 2023. Eseynan hunto cu e mercancianan nobo cu a caba di yega, ta loke lo sali pronto for di Wela pa wordo distribui rond di Aruba.
Ponson a splica cu si durante control na e negoshinan, nan ta topa cu klapchinan mas bieu cu esnan permiti, esey nifica cu e klapchinan ey no a wordo warda na Wela. Esaki lo produci un investigacion automatico y lo tin consecuencia severo pa e rebendedor cu tin e permiso e ora.
E rebendedor lo haya un boet, y e lugar por wordo cera, y tur klapchi por keda beslag. Tin chens cu e lo perde tur klapchi nobo tambe, y esey a yega di socede varios biaha caba.
Ponson a indica cu nan como instancia no por obliga e rebendedornan pa bende klapchi di 2022 prome. Esey ta keda na discrecion di e rebendedor. Ta keda na cada consumidor pa ta pendiente di klapchinan cu nan ta cumpra.
Rubin Ponson a insisti cu na Wela, e klapchinan ta wordo bon warda y den seco, pues no ta cuestion cu hopi biaha ta tende otronan ta papia di “klapchi frieu”, pero e ta insisti cu klapchinan ta keda bon warda eynan.
DOW ta controla ora e klapchinan drenta na fin di aña den deposito, y lo controla tambe ora nan sali for di Wela, unda ta check e pakinan, check e calidad, pues si berdad e ta Flowerbed cu den transporte a wordo maltrata of tin polvo ta leak, esaki mesora lo wordo saca di mercado.
Ponson asina ta indica, cu tur klapchi cu bo cumpra fin di aña, lo bay tira bon.
