Un tiki di historia di nos carnaval

ORANJESTAD (AAN): Carnaval ta un di e celebracionnan mas importante di Aruba.

E aña aki nos ta celebrando e di 70 aña di nos carnaval. Cu su musicanan contagioso y ambiente fenomenal y eventonan espectacular e ta uni e pueblo y ta atrae miles di turista den e temporada aki.

   ** Carnaval di Aruba a nace na 1954 como un serie di actividadnan chiquito di caya. Tivoli Club, un club priva tabata e prome den realiza un celebracion di carnaval na Februari di 1944. Na San Nicolas tambe a tene un desfile grandi, consisti grandi parti di imigrantenan Caribeño-ingles cu a yega Aruba pa traha na Lago. E prome bandanan di musica a debuta un aña despues y poco poco paradanan a cuminza organiza aki aya.

   ** Na 1955, varios clubnan y distritonan a uni pa celebra e prome carnaval publico di Aruba cu e prome reina oficial di carnaval. E gran parada tradicional a worde organiza na 1957.

   **Dia 11 di November 1966, pa 11.11 a funda e organo oficial cu ta organiza carnaval, Stichting Arubaanse carnaval. Tur aña e temporada di carnaval ta cuminza oficialmente riba e momento preciso aki.

   **For di 1981, Tivoli a produci e tan gusta “Lighting Parade”.

   Composicion carnaval: Na caminda pa Carnaval 70 e composicion “CARNAVAL” tambe ta cumpli 70 aña.

   E composicion di e cancion “Carnaval” ta di Rufo Wever y Padu Lampe y canta pa Edwin Zichem y coro Maria Wever, Libia Wever y Fefa Wever

   Anecdota ora di graba e composicion na Wilhelminastraat 33, cas di Rufo Wever, a lubida cu mester di un coro, e ora no tabata tin oportunidad pa busca. Dus, e dos ruman muher di Rufo (María y Libia) y su cuñá Maria Josefa, cu tabata sinta ta combersa bao e palo di tamarijn mes a acepta pa canta e refrein.

   Y nan a keda inmortaliza pa semper hunto cu e cantante Edwin Zichem locual por ser considera como e prome roadmarch di Aruba y te awe. E grabacion a tuma lugar na cas di Rufo Wever na Wilhelminastraat 33 unda antes tabata oficina di Dimas y tabata tambe warda di polis.

   (Si abo tin cualquier informacion di nos carnaval y kier comparti cu e pueblo, por mande libremente na email:عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. of WhatsApp 561-5325)