Un ola nobo di Inflacion na caminda y factornan local y internacional ta culpabel

Segun analista Simon Waslander

ORANJESTAD (AAN): E analista Simon Waslander a indica na DIARIO cu e ta sigui desaroyonan actual, y a splica con inflacion ta e fenomeno unda prijs di diferente producto di bida diario ta subi. Esaki por tuma hopi forma paso tin ambos prijs di compras chikito por ehempel manera cuminda y gasolin, na otro banda tin e prijs di capital goods, manera cas y tereno.  Waslander a splica cu e ta analisando tanto e factornan internacional y local, y ta convenci cu un ola nobo di inflacion por ta na caminda.

   Pa lectornan, esaki simplemente kiermen cu su placa den terminonan real lo bal menos. Esaki na un tempo cu pueblo ya caba ta luchando den forma profundo.
   Factornan Internacional: El a splica cu e factor mas grandi den inflacion ta e accionnan di Banconan Central grandi mane e US Federal Reserve (FED) y European Central Bank (ECB). Riba Diamars 14 November 2023, el a nota cu mercadonan financiero cu ambos pronostico official di banconan grandi mane UBS y Wells Fargo y na e opinion di encuesta di Fund Managers grandi ta di e opinion cu e nivel global di interes lo cuminsa baha muy pronto.

   Si interes cuminsa baha, inflacion lo probablemente cuminsa hisa atrobe. Pa haci esaki mas potente, tin mas cu 5.1 triyon US Dollars staciona den “Money Market Funds”, cual lo cuminsa drenta mercadonan financiero si interes enberdad cuminsa baha, mane cu consensus financiero ta verwacht.

   Factornan Local: Segun Waslander, e kier bisa den forma claro cu en absoluto e no ta critica Banco Central di Aruba (CBA) den niun manera. E decisionnan cu mester worde tuma ta debi na factornan masha complica y e team hopi experto ta haci un afweging di tur factor.
   Pero por nota si cu CBA, ta indica cu nivel di inflacion na Aruba a baha y cu e “excess liquidity” na banconan commercial a baha hopi. Considerando esakinan a kies pa un bez mas baha “Reserve Requirement” di banconan commercial.
   Normalmente esaki lo causa cu lo tin mas placa lo drenta circulacion local. Esaki normalmente lo hisa inflacion.

   Conclusion: Si enberdad interes na nivel internacional cuminsa baha y cu mas placa den circulacion na nivel local. Esaki ta pone Waslander den e opinion cu nos por experiencia un otro subida di inflacion na Aruba.

   E ta adverti, cu esaki ta djis su opinion y no conseho financiero den ningun manera. Bisando esaki, Waslander ta puntra pa nota e factornan aki den un analisis mas grandi door di expertonan concerni.