Di caracter priva pasobra ainda no ta traha pa AZV:
ORANJESTAD (AAN)- Den un entrevista cu DIARIO, e director di Instituto Medico San Nicolas (ImSan), docter Joel Rajnherc, a duna di conoce cu el a firma un acuerdo (Toelatings Overeenkomst) cu Dr. Patrick van der Linde, di Aruba Plastic Surgery.
E acuerdo aki ta nifica cu Dr. van der Linde por bay na ImSan, haci su operacionnan eynan. “Esaki a tuma lugar a base di e hecho cu el a cumpli cu tur e documentonan oficial cu e mester tin, cu su credencialnan y opleiding ta na orden y nos a, hasta, tin e bon oportunidad di bin haci un ‘proef operatie’ na un pashent, hunto cu otro ciruhano plastico di Aruba, y nan dos a bay hopi bon cu otro, y nos tin un bon relacion eynan tambe. Esey kiermen, cu dr. Patrick van der Linde ta priva, e no ta trahando pa AZV ainda. AZV tin cu wak den futuro si e por haya un contrato cu nan, pero su pashentnan particular, e ta bin opera akinan na ImSan”, docter Rajnherc a bisa.
El a agrega cu esaki ta algo cu ImSan ta hopi contento cu ne, pasobra tin hopi pregunta y demanda pa wordo opera pa un ciruhano plastico-cosmetico-estetico.
“Nos ta hopi contento cu un yiu di tera por bin bek Aruba y ofrece su cualidadnan como ciruhano. E ta hopi specializa, el a bin cu hopi ekipo, masha nobo, masha moderno; eseynan lo wordo instala na ImSan, pa e por uza su aparatonan cu e ta custumbra cu ne, nos ta zorg pa tur cos ta certifica y ‘on running’ manera mester ta.
E ta diagnostica su pashentnan, ta splica nan den su consultorio priva kico e ta bay haci, y ta laga sa nos hefe di sala di operacion sa kico ta kico y nan ta dicidi ki dia, ki ora e mag bin pa haci su operacionnan. Tur cos ta planea y ta bay bin manera mester ta. Su pashent tambe ta wordo controla door di nos anestecistanan, pues tur cos cu e pashent tin mester lo ta na ordo pa e por wordo opera na cu tur e seguridad necesario”, director di ImSan a subraya.
