Parlamentario Guedez-Erasmus (MEP):
*Biblioteca na San Nicolas tambe lo wordo renoba na 2024
ORANJESTAD (AAN): Riba e fecha di 20 januari 2024 tabata celebracion di dia di Biblioteca. Na Aruba nos conoce Biblioteca Nacional na Oranjestad y na San Nicolas. Ambos dunando bon fruto pa basta aña den nos comunidad.
Parlamentario di Fraccion di MEP, Darlaine Guedez-Erasmus a indica cu mirando cu e edificionan aki tin hopi aña, a aloca fondo pa asina renoba e edificio y pone airconan nobo. Un suma di Afl. 400 mil a ser inverti den e parti aki. Ademas, a cambia tur bentana- y portanan y ranca tur kozijnnan putri, pa pone kozijn di aluminium. Tambe dak cu ta lek a ser renoba.
Biblioteca Nacional na Oranjestad ta den bon estado awo pa un tempo largo. En total a inverti den e proyecto aki mas o menos Afl. 1 miyon. Biblioteca su localidad na San Nicolas tambe ta hayando su debido atencion pa renobacion. Dienst Openbare Werken (DOW) ta cuminsa na haci un evaluacion completo di e edificio.
E evaluacion aki lo tuma luga durante e prome kwartaal di e aña 2024, pues di awo pa maart lo tin e documentonan aki cu e costo pa inicia cu e restauracion. "Como Parlamentario mi ta hopi contento di mira cu placa ta wordo inverti na lugarnan cu mester. Biblioteca ta un caminda hopi importante pa fia/lesa buki y tambe un lugar hopi sigur pa nos hobennan por studia.
Tambe diferente workshop cu tin durante transcurso di aña, pa yuda e muchanan cu nan desaroyo personal y den e mundo di arte.
"Mi kier motiva e miembronan pa sigui bishita Biblioteca Nacional y participa na eventonan cu tin y tambe na mayornan pa encurasha boso yiunan pa bira miembro. Miembrecia pa mucha y hoben ta gratis y adulto ta 5 florin. Mayornan, hiba boso yiunan y participa hunto cu nan. Mirando cu nos ta den un era nobo di digitalisacion. Biblioteca tambe tin WiFi y ta ofrece e uzo di eBooks y Audiobooks. Esaki ta haci-e mas interesante tambe pa mucha y hoben.
Mi kier gradici Minister Endy Croes pa mira e importancia di tin Biblioteca Nacional di Oranjestad y di San Nicolas den nos comunidad. Un danki ta bay na Directora Astrid Britten y tur trahado di Biblioteca Nacional cu tin añanan haciendo un tremendo trabou", Parlamentario Guedez-Erasmus a expresa.
