Pa di nuebe aña ta bende cupcake pa recauda fondo
ORANJESTAD (AAN): E aña aki un biaha mas tin ‘Cupcake di Speranza’. Esey ta loke George Winterdaal a confirma den un entrevista cu DIARIO.
E president di GLW Foundation, a splica cu nan ta organizando pa di 9 aña consecutivo su benta di cupcake “Cupcake di Speranza”.
Manera ya a bira un tradicion, GLW Foundation organizador di Miss Teen Aruba International y Turismo Mundial ta organiza e di 9 edicion di su popular “Cupcake di Speranza”.
Segun Winterdaal, e aña aki nan ta dedica e benta na Baby Jeremiah y Famia Rasmijn.
Ban yuda Baby: Baby Jeremiah ta un baby di apenas 3 luna cu mester a worde hiba Colombia pa asina haya tratamento pa salba su bida. E baby aki a nace cu “Tratalogia di Fallot” y ta den exterior pa su salud y famianan mester mas fondo pa caba di paga full su tratamento. Y tambe parti di loke nos lo recauda lo yuda tambe.
Famia Rasmijn: Famia Rasmijn cu a perde tur cos na nan cas cu a kima na final di aña 2023 cerca di rotonde di Santa Cruz.
E pareha ya caba di edad a ricibi basta quemadura pero danki Dios nan ta cu bida y e fundacion lo kier yudanan cu loke nan por.
Pesey mes GLW Foundation cu su lema semper “Mas cu un certamen di beyeza” lo ta organizando e Cupcake di Speranza pa dianan 13 y 14 di Februari 2024.
Aki ta unda companianan y tambe individualnan por bestel cupcake den e forma simbolico di 5 Florin pa Cupcake y di e forma aki tambe yuda cu e bon causa aki. Minimo pa order ta 10 Cupcake y por bestel cuanto cu ta desea.
Pa bestelling por manda un whatsapp of yama nan na 561-6151 y haci bo pedido.
Na nomber di famia di Baby Jeremiah y tambe Famia Rasmijn, henter famia y e organizacion di GLW Foundation, masha masha danki. Tambe bo por haci un donacion si ta desea esaki na e cuenta di bancario (por comunica cu nan pa mas detaye con abo tambe por yuda).
A ser splica na DIARIO, cu nan team di boluntario lo parti e cupcake nan aki dianan 13 y 14 di Februari tanto na cas y tambe na companianan.
