Meverly Romano vocero di DIMP:
ORANJESTAD (AAN) – Den e entrevista cu Meverly Romano, Relacionista Publico di Departamento di Impuesto, el a sigui referi na e cifranan di pago y falta di pago di impuesto riba plachi number.
El a splica cu 69.000 (79%) automobilista falta di haci pago ainda di impuesto di number di auto. El a haci un yamada cu enfasis na e automobilistanan aki, pa por fabor paga nan impuesto, pasobra e boet ta bay draai dia 1 di Februari proximo, y esaki ta un gasto innecesario si cumpli cu e pago.
Romano a expresa cu DIMP ta gradici e contribuyentenan cu a cumpli cu pago. Pa loke ta 2023 tin 79.509 contribuyente cu a cumpli cu nan pago na 2023, y pa 2024, te na e momentonan aki, tin 18.371 persona cu a cumpli cu nan pago. “Masha danki pa contribui cu bo pais, danki pa contribui na tempo cu bo pago di impuesto, pasobra manera nos ta bisa semper, cumpli cu bo impuesto ta cumpli cu bo pais”, Romano a subraya.
Pa esnan cu tin cu haci pago ainda, e ultimo dianan aki, Meverly Romano a splica cu e oficinanan di DIMP ta yen, hopi druk e dianan aki, anto nan ta recomenda pa haci e pago di impuesto online, via banco. E ta facil y sigur y DIMP ta haya e datonan na tempo si e pago wordo haci na tempo tambe.
Pa esnan cu ta haci pago via banco, tin tres dato importante pa DIMP ricibi. 1. E persons number; 2. E belasting anual cu e persona ta pagando 2024; y 3. E number di e plachi auto. Esakinan ta e unico datonan cu DIMP mester.
Pa esnan cu ta paga via banco riba mas number di auto, ta recomenda pa haci un transaccion riba cada number. Esey ta facilita e procesamento di pago di DIMP su administracion y por asegura cu e ta bay mas lihe.
“Nos ta haya e datonan di banco tur dia, y ta importante pa tene na cuenta cu esnan cu ta warda te dia 31 di Januari pa haci e pago, nos ta conseha pa no hacie riba e fecha aki sino prome. Pero si ta haci’e dia 31 hacie parti mainta, pasobra atardi e banconan tin nan ‘cut of time’ y esey ta nifica cu e banconan ta cera e transaccionnan di e dia ey, cu e esakinan ta wordo procesa e siguiente dia. E ta nifica cu si un persona paga dia 31 di Januari atardi laat, e chens cu e plata ta pasa riba e cuenta di DIMP dia 1 di Februari, y Departamento di Impuesto ta wak e fecha cu e placa ta pasa riba su cuenta, y esey ta determinante, y esey ta nifica cu e contribuyente ey ta haya boet”, Meverly Romano a señala.
