Ultimo pashent di Covid-19 di Corsow a bay bek pa su isla

ORANJESTAD (AAN):  Diahuebs mainta Dr. Horacio E. Oduber Hospital a tuma despedida di e ultimo pashent di Corsou.

Un momento sumamente alegre pa Hospital y mas ainda pa e team di profesionalnan di HOH cu a traha incansablemente pa brinda cuido tur dia y den e caso aki a habri brasa pa pashent di  Corsou y Boneiro na comienso di april 2021.

            Riba 3 di april e prome pashentnan di Corsou y Boneiro a drenta HOH. Team di profesionalnan di HOH a brinda cuido na un total di 9 pashent covid-19 di Corsou y 2 pashent di Boneiro di cual tur a ser admiti riba riba cuido intensivo. Edad promedio di e pashentnan interna di Corsou y Boneiro tabata 56 aña, di cual e pashent mas jong tabatin 44 aña y e pashent di mas grandi 75 aña.

            Dia 1 di April Hospital di Aruba a anuncia cu den cuadro di solidaridad y humanidad ta saca un man pa nos islanan ruman Corsou y Boneiro cu ta pasando den momentonan sumamente dificil. Na e momentonan ey HOH a escala, habri mas cama pa pashent di Covid-19 cu consecuencia cu algun operacion electivo mester a wordo cancela. 

             Hospital orguyosamente por bisa cu tur operacion electivo a start bek y ta brindando tur e cuido necesario na e pashentnan cu ta e prioridad.