Sindicatonan Uni ta lamenta cu ainda no a yega na ningun acuerdo cu Gobierno relaciona cu e reduccion den salario

Edward Maduro ta mustra cu: 

ORANJESTAD (AAN):  Sindicatonan Uni (SIMAR, SEPPA, SPA y SADA) a convoca un rueda di prensa diahuebs mainta.

Nan vocero Edward Maduro a indica cu nan kier a duna un actualisacion riba loke tabata e ultimo rueda di prensa cu tabata tin 15 di April ultimo.

            E dia aki, nan a informa cu tabata tin un reunion cu gobierno dia 13 di April y pa motibo cu Prome Minister Evelyn Wever-Croes a duna un declaracion riba 14 di April, "cu a causa bruhacion cerca nos miembronan, preguntanan cerca nos miembronan y debido na esaki nos a splica e dia ey cu nos ta yama e rueda di prensa pa trece algun clarificacion riba locual minister a trece dilanti", Maduro a expresa.

            El a agrega cu na ningun momento a bay den un disputa of pa cuestiona, pero a yama e rueda di prensa pa clarifica algun punto cu den nan opinion no ta loke a wordo palabra na mesa.

            Maduro a sigui bisa cu e conferencia di prensa di dia 15 di April no tabata di mucho agrado pa gobierno y cu e mesun dia ey, e mandatario a contacto algun di e lidernan sindical mustrando cu nan lo a indica cu tin un conflicto cu gobierno.

            Edward Maduro a bisa cu pa nan esey tabata algo hopi straño ya cu den nan concepto ningun momento a menciona cu ta den un tipo di conflicto of impasse cu gobierno, pero mas bien cu ta sintando na mesa pa asina por yega na algun solucion pa locual ta e reduccion den e salario di e empleadonan publico.

            Tambe a papia riba e AO beleid, algun punto di e pension, FASE, pero na ningun momento den nan rueda di prensa di dia 15 a indica of laga sinti cu tin un problema. Pa e motibo ey tambe, Maduro a señala, a manda algun corespondencia cu Prome Minister dia 23 di April mirando cu a keda palabra na mesa cu dentro di dos siman lo bin bek pa asina gobierno trece 5 scenario unda cu e sindicatonan den union lo por bay bek cerca nan miembronan pa wak cual ta e scenarionan cu nan ta sinti nan mes mas confortabel cu ne pa locual ta trata e reduccion di salario, a indica.

              E siman cu mester a sinta bek tabata un sima cortico debi na dia di Rey. A purba di haya contacto cu Minister Presidente mirando cu no a haya un reaccion. Dia 26 a bolbe purba manda mensahenan informal pa Prome Minister. A remarca cu ya caba for di dia 22 di April a manda un email pa e mandatario bisando e cu nan ta na spera di e fecha pa e reunion di e siman siguiente.

            Edward Maduro a lamenta cu no a haya ningun reaccion formal di parti di minister president. A bolbe purba via medionan informal pa haya contacto cu e mandatario pero no a logra, a bisa.

            Riba un carta di dia 28, e sindicatonan a haya un reaccion di Prome Minister unda e ta indica cu gobierno ta lamenta cu a crea un percepcion cu tin un conflicto.

            Segun Maduro, pa nan esaki tabata un sorpresa pasobra si tabata tin un conflicto na mesa ta unda ta resolve esaki. Nan ta lamenta esaki.

            El a agrega cu e sindicatonan menciona no tin problema cu e mandatario kier sigui dialoga cu otro sindicatonan ya cu tur sindicato tin derecho pa sinta cu gobierno y dialoga. Pero no ta na su lugar cu a base di un percepcion di gobierno ta laga un banda 4 sindicato cu a bin ta mustra profesionalismo di purba semper di yega na mesa cu gobierno pa busca un solucion.

            Awor ta teme cu desicionnan por cay y cu e miembronan di e sindicatonan uni no ta involucra den e decision, Edward Maduro a duna di conoce.