ORANJESTAD (AAN): E tabata algo cu a wordo experiencia aña pasa caba na Merca, y awor ta parce cu algo similar ta pasando na Aruba.
Esta scarcedad hopi notable di autonan di huur, y varios turista na final ta haya nan ta pasa nan vacacion riba e isla coriendo den Taxi of Bus.
Den fin di siman cu a pasa, un cantidad grandi di turista a yega Aruba y aunke hopi ta usa compania di Transfer y tambe Taxi pa rapidamente yega nan Hotel of Resort, tin otronan cu a keda pasa di un oficina pa otro di Car Rentalnan enbusca di auto pa huur, sin ningun resultado.
Hasta e companianan mas chikito di auto a huur tur loke nan tin, y no tabatin nada extra pa ofrece esnan cu tabata buscando un vehiculo desesperadamente.
NO PAGA NUMMERPLAAT: Di con diripiente awor na comienzo di 2022 tin scarcedad di V-auto na Aruba? Algun persona a splica cu algun tempo pasa diferente Car Rental a haya nan ta bende nan autonan pa asina nan por keda existi y haya spending cash pa por a keda sobrevivi durante pandemia. Y awor cu ta cuminza recupera, e problema ta cu algun di nan no por haya auto nobo ainda.
Tambe tin e situacion, cu tin algun Car Rental cu no a logra paga nan Nummerplaat na tempo. Un observador a hasta indica na DIARIO cu ta parce cu algun compania na forma clandestino a cuminza usa A-nummer, aunke esey no por a wordo confirma cerca otro personanan cu tin conocemento riba esaki.
Varios Car Rental ta trata na keda cu cabez riba superficie manteniendo nan autonan cu a bira awor algun aña bieu.
Esaki ta trece cune cu varios auto ta hayando problema! A ser splica na DIARIO cu algun auto no tin e Car-Stereo mas ta funciona. Otronan tin problema cu e power windows no ta baha mas, y ta keda constant hisa. Tin hendenan cu a huur auto y no a haya luznan interior ta funciona.
CULPA E PANDEMIA: Ora cu Covid-19 y e lockdown a dal Aruba, algun compania di Car Rental a bende nan autonan bieu pa asina por sobrevivi. Awor cu viahamento a cuminza bek, e companianan ta tratando di aumenta nan tamaño di fleta pa asina cumpli cu mas y mas demanda. Pero pa colmo tin e crisis global pa cu transporte, y tambe scarcedad di microchip di tal forma cu algun fabrica di Auto no por produci vehiculo na mesun ritmo cu pasado.
Esey ta afectando Car Rental na varios pais rond mundo. Aña pasa mes na Merca, tabatin asina hopi scarcedad di auto di huur, cu turistanan a haya nan hasta obliga na huur Truck grandi di U-Haul pa asina por haya algo pa core cune.
Pesey mes tin awor e sugerencia pa bo haci reservacion hopi adelanta mes pa bo tin siguranza cu bo ta haya un auto di huur. Tin biaha hasta si bo haci esaki 6 luna adelanta, bo ta ‘laat’ caba y lo bo no haya auto.
Den fin di siman cu a pasa, riba di 4.100 turista a yega Aruba riba Diasabra so. Restaurantnan tabata yen tanto riba Diasabra anochi y tambe Diadomingo anochi.
