ORANJESTAD (AAN): Minister di Finansas y Cultura, Xiomara Maduro a bisa den conferencia diabierna
cu e recorte di salario (12.6%) di e empleadonan publico no tin di haber cu otro situacionnan manera esun di e parada di luz cu ta bay tuma lugar fin di luna.
El a splica cu ora di celebra carnaval na Aruba, e fondonan ta fondonan cu Oficina di Turismo ta contribui mescos cu sector comercial pa asina por haci carnaval di pais Aruba posibel.
E biaha aki, gobierno, for di Ministerio di Cultura, a haci un apelacion na ATA pa nan por aporta cu e fondonan aki pa por organisa e carnaval. Carnaval tambe ta encera cu tin diferente departamento di gobierno cu ta yuda den e parti aki, a remarca. Y manera semper, ta pidi e cooperacion di departamentonan manera DOW, ambulans, polis, entre otro.
Esaki no tin di haber cu e parti di recorte. E mandatario a agrega cu loke Aruba a haya presta di Hulanda ta 904 miyon florin. Casi mil miyon florin. Si ta tuma e debenan cu Hulanda ta paga pa Aruba internacionalmente ta bira 1.5 miyon florin.
Pa Aruba haya esey tabata tin e condicionnan. Un di e condicionnan tabata e recortenan. "Si awe nos tabata tin ok pa paga e recorte ey, e ta 41 miyon florin. Si awe nos tin e ok di e sindicatonan pa paga e 5% eynan bek, dus cu tin su condicionnan, e 5% ey lo costa gobierno 18 miyon florin", Minister Maduro a indica.
No ta papiando mes di e miyones den inversion cu kier hinca den locual ta bira e parti aki den anticipacion di celebracion di e dia nacional, a enfatisa.
Maduro a expresa cu aworaki gobierno ta dunando un empuhe pa por cende un mecha pa e carnaval 2023 por ta uno exitoso na beneficio di henter Aruba.
