Banco Central di Aruba (BCA)
Banco Central di Aruba (BCA) ta publica e “State of the Economy” pa e prome trimester di 2025. E publicacion aki ta contene un analisis di desaroyonan nacional y internacional.
Den e prome lunanan di 2025, Aruba su economia a sigui expande, maske cu un impulso modera compara cu aña pasa. Durante e prome trimester di 2025, Aruba su Producto Domestico Bruto (GDP) a crece cu 4,2% den termino real compara cu e mesun trimester un aña pasa, despues di un crecemento fuerte di 9,7% den e prome trimester di 2024. Crecemento economico real a base di GDP pa habitante tabata 3,2%, cu ta mas abou compara cu e subida den GDP total. Esaki ta indica cu aunke tabata tin progreso economico pa persona, esaki tabata menos fuerte compara cu e expansion total di nos economia.
Turismo ta keda e contribuyente principal na e crecemento economico. Den e prome trimester di 2025, e cantidad di bishitante “stay-overs” a subi cu 2,5% compara cu e prome trimester di 2024. Sinembargo turistanan a keda mas cortico na Aruba, unda cu e duracion promedio di estadia tabata 7,2 dia. Esaki ta refleha un bahada chikito compara cu aña pasa, y en general un desaroyo di e delaster añanan. No obstante esaki, e industria hotelero a raporta un resultado fuerte, unda cu e tarifa pa camber a subi cu 10,3%, y entrada pa camber disponibel cu 7,0%. Di otro banda e grado di ocupacion a mustra un bahada, parcialmente door di e expansion di 12,3% den cantidad di camber di hotel.
Mayoria di e indicadornan relata na consumo domestico a registra un mehoracion. Relacion di trabou registra na SVB a crece cu 3,4%, cu ta fungi como un indicador di entrada disponibel pa consumo di hogar. Ademas entrada di BBO y BAVP y di impuesto riba mercancia a aumenta. Mientrastanto presionnan inflacionario tabata debil, unda cu e tasa di inflacion, basa riba un promedio di 12 luna, a baha di 1,7% den december 2024 pa 1,4% na maart 2025. Un caida den prijs di energia y un bahada den e inflacion di cuminda tabata e componentenan principal cu a contribui na esaki. Ademas e tasa di inflacion a base di compara prijsnan di un luna cu e mesun luna 1 aña prome tabata 0,1%, bahando for di 0,3% den december 2024.
Actividadnan relata na inversion den e prome trimester di 2025 a señala desaroyo mixto compara cu e prome trimester di 2024. E balor di hipotecanan comercial a registra un subida fuerte, mientras cu e cantidad di hipotecanan comercial a aumenta menos lihe. Permisonan di construccion tambe a subi den cantidad y balor. Sinembargo e indice di e “Business Perception Survey (BPS)” a baha cu 4,8 punto di indice te na 102,0, reflehando menos optimismo den e percepcion di negoshinan local di e economia di Aruba.
E cuenta coriente di e balansa di pago a registra un surplus di Afl. 508,7 miyon den e prome trimester di 2025. E fuente principal di e surplus aki tabata e entradanan halto relata na turismo. Ademas e cuenta financiero a registra un subida den prestamo netto compara cu aña pasa. E crecemento aki tabata primordialmente door di un desaroyo positivo (+ Afl. 115,8 miyon) den e posicion di reserva di divisas y oro di BCA. Consecuentemente den e prome trimester di 2025, reservanan oficial tabata estima na 133,0% di e “Assessing Reserve Adequacy (ARA) metric” di e International Monetary Fund (IMF). Reservanan internacional a keda ampliamente adecua, cubriendo 8,1 luna di pago di e cuenta coriente den e balansa di pago, considerablemente mas halto cu e minimo recomenda di 3,0 luna.
E sistema bancario di Aruba a keda solido y stabiel. Credito pa sector priva a expande, principalmente via prestamo pa negoshi (+Afl. 48,0 miyon) y hipotecanan di cas nobo (+Afl. 12,0 miyon), mientras credito pa consumidor a baha compara cu december 2024. E tasa di prestamonan den un situacion di incumplimento (e asina yama nonperforming loans ) a keda abou, y e buffer di capital y likides a fortalece den e periodo analisa.
Finansas publico a sigui desaroya di forma positivo. Den e prome trimester di 2025, gobierno di Aruba a raporta un surplus fiscal di Afl. 42,6 miyon, a pesar cu tabata tin un subida den gasto. Na final di maart 2025, e proporcion entre debe y GDP a sigui baha y ta estima na 67,2%, compara cu 75,9% un aña pasa, continuando su trayectorio di contraccion desde su punto mas halto durante e pandemia.
E publicacion completo ta disponibel riba BCA su website:
(https://www.cbaruba.org/document/state-of-the-economy).
