Monique Hoogerwerf, cordinador di Caribe pa DUO
ORANJESTAD (AAN): Representantenan di Dienst Uitvoering Onderwijs (DUO) ta na Aruba desde awe te cu 5 di december pa duna informacion na studiantenan, mayornan y ex-studiantenan di Caribe Hulandes tocante financiamento estudiantil y pago di debe di estudio.
Monique Hoogerwerf, coordinador di Caribe pa DUO, den un entrevista recien cu DIARIO, a enfatisa e importancia di ta bon informa: “Nos kier pa tur studiante sa exactamente con e sistema ta traha, kico e rekisitonan ta, y cuanto nan por ricibi of presta. Ta hopi importante pa nan compronde cu tur prestamo semper mester wordo paga bek cu interes.”
Durante e bishita, DUO a organisa varios charla pa brinda informacion. E prome dos sessionnan lo ta tocante studia na Hulanda. E cuponan pa e sessionnan aki a yena di biaha.
Tambe tabata tin un session special tocante e pago di debe na unda ex studiantenan cu mester cuminsa paga bek otro aña a wordo invita. Aki representantenan di DUO a splica opcionnan di pago, manera baha e suma mensual of paga via un cuenta bancario local na Aruba. Segun señora Hoogewerf, poco biaha studiantenan ta haci uzo di e varios posibilidadnan di paga bek cu tin y hopi biaha ta sea paga loke nan no mester a paga of ta cay den problemanan pa paga bek.
Señora Hoogewerf a remarca cu DUO tin un oficina temporal (pa dos siman) na Directie Onderwijs Aruba (edificio JFK) na unda nan lo brinda informacion individual. Universidadnan y studiantenan cu kier studia na Hulanda lo wordo yuda cu scogemento di loke nan kier studia. Pa mas informacion, por bay riba e website di DUO (duo.nl/cariben).
