ORANJESTAD (AAN): Aruba ta uni na e campaña global “Orange the World” cu Nacionnan Uni a lansa na aña 2008 den esfuerso pa combati violencia di genero.
Tur aña, entre 25 di November (Dia di Violencia Contra Hende Muhe) te cu 10 di december (Dia di Derecho Humano), mundo ta dedica 16 dia di activismo, cu un solo meta: crea un futuro unda tur mucha y tur hende muhe por biba sin miedo.
Den entrevista cu DIARIO, representantenan di Soroptimist International Club Aruba (SICA) a splica mas di nan organisacion y e trabounan cu nan ta bin ta haciendo pa nos comunidad entre otro charlanan tur luna cu temanan hopi atractivo y relevante na situacionnan actual den nos sociedad.
Den e fin di siman aki, den conexion cu e campaña global “Orange the World”, SICA ta presenta cu orguyo nan prome edicion di ‘Orange Awareness Carousel’—un evento di inspiracion, ciencia y empoderamento. Durante e mainta di charla, cinco dama di nos comunidad lo comparti nan conocemento, nan berdad y hermentnan practico pa sigui fortalece nos comunidad den e lucha pa elimina violencia contra hende muhe y mucha muhe. E oradornan ta Paloma Tromp, Gilliany Oduber, Suzette Kock, Carolina Pieters-Janer, y Barbara Richardson.
‘Orange Awareness Carousel’ lo tuma luga diasabra dia 29 di November 2025 di 10:00 am te cu 2:00 pmM na EduCampus Aruba (Ex Bin Bini Bazaar). Entrada ta gratis, pero tin di registra prome via WhatsApp na 561-9100 of 736-965. Ban uni, siña y halsa otronan, trahando pa un futuro mas sigur pa tur mucha y hende muhe.
