Parlamentario Darlaine Guedez-Erasmus:
ORANJESTAD (AAN): Den reunion publico dia 14 di maart 2022 Minister di Husticia y Asuntonan Social a trata e situacion di nos hobennan na Aruba. Durante e reunion por a scucha e preocupacionnan cu tin di haber cu nos hobennan na Aruba. Sigur cu nos kier mira diferente cambio na unda tur hoben, hasta esnan cu pa un of otro motibo ta comete un eror, ta haya e oportunidad pa desaroya bon den bida.
Minister a haya e oportunidad pa splica e vision di maneho cu e ta bezig cu ne na e momento aki y su proyectonan den corto y a largo plaso pa nos hobennan.
Un di e proyectonan cu sigur a hala mi atencion mirando e necesidad cu tin na Aruba ta e begeleid zelfstandig wonen (biba bou guia pa independisacion). E proyecto aki den pasado tabata existi caba, pero no a sigui aloca fondo pa esaki. Esaki sigur ta di lamenta paso di tur e hobennan cu tabata participa na e proyecto aki 80% di nan tabata sali di esaki exitosamente, recuperando nan independencia, hayando oportunidadnan nobo y recobra nan confianza. Mi ta content cu Minister Tjon a mira e importancia y necesidad pa regresa cu e proyecto aki. E grupo di meta ta e hobennan entre 16 – 25 aña cu mester di un structura di bida sano. E hobennan ta ricibi terapia cognitivo, siña habilidad, siña crea un actitud positivo, pa asina sigui den bida cu motivacion y e por ta un bon persona pa su mes como bon ciudadano pa nos pais.
“Mi persona a subraya e proyectonan positivo cu ta andando pa nos hobennan como ehempel, Poder pa Hubentud, Pitch Time, Aruba Doet y otro cu ta di bon influencia riba desaroyo di nos hobennan. Tambe mester sigui motiva e trabao boluntario pa forma un actitud di cooperacion cu otro y traha hunto,” Guedez-Erasmus a bisa.
E Parlamenario di MEP a finaliza bisando: “Mi lo keda monitorea e desaroyonan riba e area aki di cerca y durante tratamento di presupuesto 2022 sigur lo mi bolbe vocifera e importancia pa esakinan keda concretisa.”
