ORANJESTAD(AAN): Diadomingo dia 20 di Maart ta bay tuma lugar e prome edicion di ‘One Healthy Day’,
cu e meta pa sigui concientiza tur hende cu ta importante pa enfoca riba un bida saludable, tanto fisicamente como tambe mentalmente.
Riba e dia aki ta bay tin varios actividad y evento rond Aruba y durante un conferencia di prensa e conocido artista Arubiano Ataniro (Janiro Eisden) a papia di su participacion den One Healthy Day.
“Mi mes ta un persona cu semper a percura pa mi salud mental y fisico y mi ta kere cu e dia aki riba su mes ta un dia unico”.
Di berdad ta na su lugar pa organiza un evento asina pa un pueblo manera esun di Aruba.
Actualmente nos tin mester di dje, specialmente pa loke ta e parti di salud mental, segun Ataniro.
El a sigui bisa cu pa un bon salud, bon musica tambe ta contribui.
Segun Ataniro, Diadomingo pa 7’or di anochi musica ta start den cura di Cas di Cultura.
“Nos ta bay cambia e venue completo na estilo di concierto, unda cu Ataniro & Band ta bay tey sigur”, segun e artista kende a haci un invitacion na tur hende pa no solamente disfruta di e banda, sino pa bishita e diferente booths cu informacion cu ta bay tin na Cas di Cultura.
