ORANJESTAD (AAN): Foundation Innovation Campus for Education Aruba (FICEA) conhunto cu International School of Aruba Online (ISAonline)
a anuncia cu nan a asocia di forma strategico pa asina provee un forma di enseñanza innovativo y alternativo pa famia(nan) na Aruba.
DIARIO a compronde cu e convenio ta trece EduCampus Aruba y ISAonline hunto por medio di diferente areanan caminda ambos organizacion ta desea di colabora pa asina brinda nan studiantenan un experiencia cu ta enriquese e conocimento y desaroyo di cada studiante participante na e modelo.
EduCampus Aruba ta busca pa amplia nan opcion di plataformanan educativo online pa e studiantenan y pa e mayornan cu ta busca solucion alternativo y innovativo pa e enseñanza di nan yiu(nan). Ademas di esaki, EduCampus Aruba ta provee oportunidad pa e studiantenan por participa di forma presencial den un variedad amplio de materianan selectivo riba nivel.
E materianan ta enfoca riba e areanan di deporte, arte, idioma, sostenibilidad, abilidadnan di siglo 21 y cursonan cortico encuanto innovacion, media y civismo en general.
ISAonline a worde lansa na augustus 2021 como un programa di International School of Aruba den convenio cu International School Services pa ofrece eduacion online di calidad na e studiantenan di Aruba. E curiculo global di ISAonline ta enfoca riba e totalidad di cada alumno enfatisasando e desaroyo y empoderamento di su caracter y tambe su accion.
Segun Theresa Montenarello, Coordinador di Programa di ISAonline, mediante e colaboracion aki famianan na Aruba lo tin un otro alternativa di educacion ora nan ta en busca pa e miho opcion pa nan yiunan. Siguientemente, e ta indica cu asociacionnan asina ta trece Aruba un stap mas cerca pa asegura un calidad di enseñanza pa tur.
EduCampus Aruba lo provee un espacio di aprendizahe safe y a la bes apoya e alumnonan cu ta registra den ISAonline. Adicionalmente, e dos organizacionnan lo brinda desaroyo profesional, colaboracion den investigacion riba e impacto di enseñanza online y lo duna recurso educacional semper cu ta posibel.
“Nos meta ta pa brinda enseñansa personalisa segun interes y necesidad di cada studiante ” segun Edgar Croes President di FICEA, e bestuur cu ta maneha EduCampus Aruba.
