Organiza pa GP-297, IPA y SIMAR:
ORANJESTAD (AAN) – Chando Pietersz, di e “GP-297, na vanguardia di enseñanza” a señala, den rueda di prensa hunto cu IPA y SIMAR, den cual a anuncia e Conferencia: “Enseñanza nos Responsabilidad”, a expresa cu enseñanza den practica ta un asunto compleho, y cu conoce multiple faceta.
“Ta imposible pa atende den un solo Conferencia cu tur e facetanan cu maestronan di scol, dirigentenan di scol, ta exclama cu mester innovacion, cu mester cambio. E organizadornan, desde un inicio a tuma contacto cu veld y dirigentenan di nos enseñanza, y a yega na seis tema cu nos ta kere cu pa e Conferencia aki ta na su lugar”, Pietersz a bisa, y seguidamente a menciona e seis temanan cu a wordo señala: 1. Enseñanza continuo y sin barera. 2. Lenganan den enseñanza. 3. Reto y perspectiva di, pa maestronan na pia di trabao. 4. Profesionalizacion continuo di e maestro. 5. Enseñanza cu sentido nacional y internacional. 6. Ehecucion y financiamento di proyectonan di innovacion.
Seguidamente, Chando Pietersz a introduci tres orado cu a duna un resumen di e tema cu, respectivamente, nan lo trece dilanti, durante e conferencia.
