ORANJESTAD (AAN): Den ora nan di Diahuebs marduga, Centro Operacional Maritimo di Wardacosta (MOC) a ricibi un yamada via di VHF Marine Radio canal 16 pidiendo asistencia medico riba lama.
Ta trata di un tanker cu e momento ey tabata nabega west di Aruba. Un di e tripulante nan di e barco a lastima su cabes y tabata den necesidad di asistencia medico. Ta trata di un hende homber di 33 aña di edad cu nacionalidad Chines.
Miembronan di MOC a inmediatamente tuma contacto cu e medico na warda di Citro cu a recomenda pa evacua e persona mas lihe posibel. Cu rapidez a alerta tripulantenan di e Helicopter cu a lanta vuelo, y sali mesora pa asina busca e persona riba e barco tankero.
Nan a hisa e tripulante herida abordo, y asina cuminza bula direccion pa e Steunpunt di Wardacosta na Savaneta. Sinembargo na caminda pa yega Aruba, e tripulante a fayece den Helicopter.
Ora cu e Helicopter a ateriza na Aruba, nan a entrega e curpa na autoridadnan local, cu lo bay intermedia cu agencia pa asina e restonan mortal wordo debolbi pa su pais natal. Wardacosta di Caribe Hulandes ta manda palabranan di condolencia.
