Thomas Ruiz, Secretario di VRA ta lamenta:
ORANJESTAD (AAN) Señor Thomas Ruiz, Secretario di Vereniging Rijscholen Aruba (VRA), den entrevista cu Matutino DIARIO, a expresa cu e ta lamenta cu ainda Gobierno nobo no ta mira e problema cu Departamento di Rijbewijs ta causa hendenan cu mester haya nan rijbewijs.
Ruiz a señala cu tin hopi preocupacion y disgusto di con cosnan ta bayendo, specificamente, den Bureau Examen Rijbewijs. El a expresa cu tur hende sa cu e Departamento no tin personal pa traha. VRA tin ocho aña bringando pa un bon maneho di e departamento aki.
“Nos a cuminza cu Bikker, Rocco Tjon a tume over, a priminti y no a cumpli, y e ta necesario pasobra nan no por handle e departamento. Nan ta haci nan best si, mi tin cu bisa, pero ya…bo no por dobla hero cu man. Pero nos ta bin cu e punto cu e servicio no ta optimal e ora ey. Bo ta perhudicando e bijscholen, pues nos miembronan, y ta perhudica e publico, cu mester su rijbewijs” señor Ruiz a señala.
El a agrega cu si wak e sistema di email, e ta un desaster. E afspraak ta di un pa dos siman, pero awo a para bira di tres pa cuater siman. “Nan ta haciendo nan best pero bo ta ripara cu ta birando casi imposibel pa duna e servicio manera mester ta. E ta perhudicando comercio pasobra su hendenan no por haya e rijbewijs necesario na tempo, pero tambe e hendenan cu tin cu bay afo, e studiantenan cu tin cu bay afo y tur otro persona cu mester un rijbewijs mas lihe posibel”, Thomas Ruiz a remarca.
