Aumento alarmante den fayecimento di Adultonan Mayor merece un investigacion serio

President di OPPA Ivo Valdes

ORANJESTAD (AAN): President di OPPA Ivo Valdes a indica cu durante e periodo di 2024 te cu november 2025, Aruba a perde un total di 624 Adulto Mayor. Solamente den 2024 a muri 345 persona riba edad avansa y den 2025, te cu awor, a muri 279. Esaki ta cifra cu tin peso pa un isla chikíto manera Aruba.

Loke ta trece mas preocupacion, ta e dato cu den categoria 60–69 aña, un grupo cu normalmente no ta clasifica como “behes”, a muri 106 persona den apenas dos aña.

E number aki ta pone un pregunta serio riba e funcionamento di nos sistema di cuido y prevencion medico.

Mientras cu bida natural semper tin su curso, e volumen y ritmo di falyecimento den e grupo aki ta mustra cu algo den nos sistema di cuido ta merece atencion inmediato.

No ta rasonabel pa asumi cu tur fayecimiento ta simplemente producto di edad.

Aruba tin una expectativa di bida di 74,1 aña pa homber y 80,3 aña pa muher; sin embargo, e realidad ta mustra cu hopi hende ta muri prome cu yega e averagenan di e  expectativa bida.

Valdes ta enfatisa cu nan preocupacion no ta basa riba emocion, sino riba hecho:

• Ta dificil pa haya cita a tempo.
• Seguimento pa e enfermedadnan cronico manera diabetes, hipertension y malesa        di corason ta insuficiente.
• Servicio di dokter di cas y specialista ta sobrecarga.
• Diagnostico ta tuma demasiado tempo.
• Y e sistema comunitario di cuido no ta siña di e presion cu e tin riba e adulto   mayor.

E situacion aki mester transparencia y accion inmediato.

OPPA ta pidi:

1. Un evaluacion nacional independiente di causa di muerte di e adultonan mayor, sin nomber, pero cu dato suficiente pa analiza tendencia.
2. Un revision urgente di acceso na cuido preventivo, particularmente pa persona cu malesa cronico.
3. Mehora fundamental den sistema di cita, pa evita diagnostico tardi.
4. Un analisis di carga di trabou di dokter di cas y specialista, cu recomendacion pa reforsa e sistema.
5. Mas programa preventivo na nivel comunitario, cu enfoke riba presion, sucu, colesterol y obesidad.

Nos tin e obligacion moral pa proteha un di e grupo mas vulnerabel den nos sociedad.

E number no ta papia so: e ta grita pa atencion. Adulto mayor no ta muri solamente door di edad; si nos sistema di cuido no ta den bon estado, nos pueblo tampoco ta den bon estado.

OPPA ta pidi cu autoridadnan tuma medida inmediato pa preveni cu 2026 no trece un cifra mas preocupante.