ORANJESTAD (AAN) Un pensionado di SVb a tuma contacto cu DIARIO, despues cu Diabierna el a yama Seccion di Pensioen di SVb,
pero no a logra comunica, pa puntra si nos sa “ki hubo” cu e promesa di Prome Minister y Minister Wever, cu lo paga 250 florin atrobe, di Reparatie Toeslag, na December awo (2025), riba e pensioen AOV, y cu otro aña lo completa e suma di 750 cu a wordo priminti durante campaña.
E ta puntra esaki pasobra no a tende nada mas. SVb a pone den FB page un video den cual un trahado femenino ta papia tocante e derecho di tur pensionado di haya su bonus di pensioen cu e aña aki lo bira 1 di December, hunto cu e pensioen regular. Pero nada a menciona tocante e ahustacion di reparative toeslag manera gobierno a vocifera algun luna atras, y e ta kere, of si no ta hera, minister Gerlien tambe a bisa algo asina na mita di aña.
E pensionado ta kere cu si gobierno tin pa paga un director nobo di Aeropuerto mas cu un miyon florin pa aña lo no por t’asina dificil pa cumpli cu e 750 di ahustacion cu a priminti e pensionadonan di AOV, durante y despues di campaña y cu a cumpli si cu e prome tercer parti. E ta spera cu gobierno lo reacciona na su pregunta aki, prome cu dia 1 di December, pa e pensionadonan haya sa.
