Etapa nobo di Paso Doble di Benny bou Piñata Family & Friends
- Misil di prueba por ta parti di dimension nobo di e scandal
- Mike a prefera pa AVP kibra cu pa Benny come den prison
ORANJESTAD (AAN)- Ministerio Publico a anuncia, cu e ta apela e sentencia di Huez den Prome Instancia y cu e ta entrega e caso na huicio di Corte di Husticia, cu lo wordo representa pa tres Huez.
Esaki por trece cambio completo den e panorama di futuro di Benny Sevinger cu por sali liber, por ricibi un castigo mas suave pero tambe un castigo mas pisa.
Expertonan ta mustra cu awor por spera confrontacion den cual misil di prueba lo sostene acusacionnan serio relaciona cu mas cu corupcion, pa cual ya Benny a wordo castiga.
E decision di Corte di Husticia ta crea un dimension nobo na e Caso Avestruz, cu ya ta briya pa e realidad di dos midi, cu cual e partido AVP a duna prueba cu e ta midi y cu a ocasiona kiebra den AVP.
Ley ta bisa cu un persona cu wordo condena dor di Huez no por ta den Parlamento, pero e partido di Mike Eman y Benny Sevinger, a dicidi cu pa Benny esaki lo no ta e caso. A wordo dicidi cu Benny no ta come cuminda di prison, pero cu Benny ta keda Miembro di Parlamento di Aruba y ora Parlamento logra traha den Overtime, Benny tambe ta come cuminda cu Pueblo ta paga na restaurant caro na Aruba of den exterior.
Pues Benny ta keda den Parlamento y lo no come cuminda di prison manera otro personanan cu a wordo condena na momento cu Mike Eman ta hiba un campaña den cual e ta uza e dolor cu hamber ta causa, pa e haya voto.
Mike Eman y su partido a cera porta di prison pa Benny cu e argumento cu Benny Sevinger ta apela su caso y asina ta keda den Parlamento loke ta nifica cu Benny lo no forma parti di Pueblo, cu no tin placa pa cumpra pan y ta biba den un pobresa creciente, manera Mike pa kita bista for di Caso Avestruz y haya voto, ta bisa.
Ministerio Publico pues no ta di acuerdo cu Mike Eman y a apela e decision di Huez den Prome Instancia.
Ministerio Publico ta di opinion cu e sentencia di Huez contra Benny no ta refleha e sentencia cu na su opinion Benny Sevinger merece pa su participacion den caso Avestruz.
Kico lo bay pasa? Mike a kibra hasta su partido pa su amigo del alma no mester bandona Parlamento.
Mike, hunto cu Benny Sevinger, a atende cu e 1.6 Biyon di proyectonan Bo Aruba cu a causa hamber pa e Pueblo pagador di belasting, cu no tin placa pa cumpra cuminda pasobra mester paga e debenan cu Mike a laga atras.
Awor Mike ta kibra su partido pa Benny sigui gana placa den Parlamento mientras Mike mes pa haya voto den eleccion, ta splica cu Pueblo di Aruba ta sufri di hamber.
Un turbulencia total a wordo ocasiona dor di e tango politico di AVP.
E hecho cu Benny Sevinger a apela e sentencia di Huez ta nifica cu Benny ta sigui gosa di e abundancia di Miembro di Parlamento, pa cual Pueblo, cu segun Mike Eman tin hamber, mester paga.
Benny Sevinger no kier castigo y kier wordo declara liber mientras friendsnan di AVP si ta bay prison.
Di otro banda, Ministerio Publico ta para ariba, cu Benny Sevinger merece mas castigo y manera nos por comprende di fuentenan bon na haltura, awor ta cantidad di prueba lo por subi mesa pa destrui e piñata di family & friends di AVP, cu tabata colga riba e neishi yena cu webo di oro di avestrus, cu no a mira nada.
Kico ta bay pasa?
Ta spera cu Ministerio Publico a studia e caso di Benny Sevinger bon y a apela pasobra e tin misil pa manda direccion di e Avestrus cu ta come pero no ta mira nada.
Finalmente esaki ta nifica cu un Pueblo cu hamber, manera Mike Eman ta bisa, mester paga pa Benny Sevinger ricibi placa y cuminda como miembro di Parlamento.
Tratamento di e caso den apelacion por tuma su tempo y den e tempo aki, Pueblo por keda cu hamber pero Benny Sevinger por sigui come cu un bon salario di Parlamento pa despues e enfrenta misil pisa di acusacion, cu segun informantenan
Ministerio Publico lo lansa den Corte.
