ORANJESTAD (AAN): Cada aña riba 27 di april, Reino Hulandes ta celebra e fecha natalicio di Su Mahestad Rey Willem Alexander.
Diahuebs 27 di april, Rey Willem Alexander a cumpli 56 aña.
Pa tur e paisnan cu ta forma parti di Reino Hulandes, e fecha aki ta hopi importante y ta conmemora e fecha aki na grandi cu diferente actividad y weganan popular.
Rey Willem Alexander, mescos cu su mama Prinses Beatrix, tin un luga special den su curason pa e islanan Hulandes den Caribe. Na fin di januari di e aña aki. Rey Willem Alexander hunto cu Reina Maxima y Prinses Amalia tabata na Aruba y a sinti tambe cu tin un stimacion y aprecio grandi pa Famia Real na Aruba.
Prome Minister Evelyn Wever-Croes, den nomber di Gobierno di Aruba y particularmente den nomber di pueblo di Aruba, ta felicita Su Mahestad Rey Willem Alexander y ta dese’e bida largo, cu hopi salud y bendicion. Y cu Rey Willem Alexander pasa un dia excelente hunto cu su su sernan mas stima.
