Minister Geoffrey Wever a firma Landsbesluit
*AFTA lo cuminsa opera 1 di September 2023
ORANJESTAD (AAN): Minister Geoffrey Wever a firma e Landsbesluit (Decreto Gubernamental) a base di cual e prome parti di e ley di Aruba Fair Trade Authority (AFTA) ta drenta na vigor. Pa varios luna Minister Wever y e team di implementacion ta bezig cu e trabounan preparatorio pa Aruba Fair Trade Authority por cuminsa opera 1 di september 2023.
E proyecto aki ta wordo financia cu fondo Hulandes y cu fondo di Aruba. Como parti di e ayudo Hulanda a pone un experto riba e tereno di mededingingsrecht disponibel pa yuda Aruba implementa e Aruba Fair Trade Authority. E ultimo lunanan e team di implementacion ta bezig ta prepara website, oficina, proceduranan, HR beleid, AO/IC, profielschetsen pa miembronan di e Raad van Bestuur, etc.
Tur cos ta cla pa cuminsa e proceso di solicitacion di e miembronan di Raad van Bestuur. Minister Wever a institui un comision consistiendo di entre otro e profesional Hulandes cu a bin yuda Aruba, Presidente di Corte Commun, Sr. Maurits de Kort, y un represenante di e compania di HR cu ta asisti cu e proceso di solicitacion.
Pa e proceso di solicitacion por start oficialmente e Landbesluit cu Minister Wever a firma awe ta necesario. E proceso di solicitation lo ta uno transparente y cu mester conduci na e miho candidatonan.
Minister Wever lo nombra e miembronan di e Raad van Bestuur basa riba e conseho di e comision di solicitation y despues e Raad van Bestuur lo continua cu e proceso di solicitacion di e personal di Aruba Fair Trade Authority.
“Nos ta trahando duro pa Aruba Fair Trade Authority cuminsa su operacion 1 di september 2023. Aruba Fair Trade Authority lo mehora competencia entre companianan na Aruba, cu lo tin como consequencia cu tin mihor prijs y mihor calidad di producto y servicio. E ta un trabou grandi y importante cu nos ta haciendo y mi ta kere cu Aruba Fair Trade Authority ta bai tin un impacto sumamente positivo riba nos economia”, segun Minister Wever.
