Tremendo opendag 2023 di NV ELMAR hopi bon bishita: hopi pregunta a wordo contesta  

Director Anthony Irausquin hopi contento, satisfecho y agradecido

ORANJESTAD (AAN) – NV Elmar a tene su opendag 2023, cu a resulta sumamente exitoso.

            Director di NV Elmar, señor Anthony Irausquin, den entrevista cu DIARIO a expresa cu e tabata hopi contento y satisfecho di e open dag aki, despues di 12 aña cu nan a organiza uno.

            Yrausquin a declara cu Diasabra tabata un dia hopi exitoso, cu bishita di ciudadanonan henter dia, drenta sali, tabata tin diferente booth cu hopi informacion. Tabata tin hopi pregunta den pueblo, cu probecha e oportunidad di bishita e compania, haci pregunta, haya contesta, vooral tocante cobranzanan cu ta bin halto, smart meters, autonan electrico, entre otro. Pero tambe hopi importante, cu por a mustra cuanto trabao e tecniconan ta haci pa restablece coriente ora cu ta surgi diferente storing na Aruba.      Yrausquin a expresa cu el a keda hopi contento cu e trabao di e team cu a organiza y di tur su trahadornan. El a comenta cu den su 23 añanan como director di NV Elmar, e ta hopi satisfecho cu su empleadonan y con e team work a logra, vooral na ultimo ora atrae e pueblo pa ta presente.

            Muchanan a subi nan trucknan bay na halto, wak kico ta e trabao, vooral esnan cu tin cu scoge un trabao pa nan futuro. Tecnologia ta algo hopi importante pa scoge, Irausquin a subraya, pasobra e ta den un desaroyo inmenso y tin espacio pa estudio den e parti tecnico.

            Tambe tabata tin un bunita presentacion di cuadro y pinturanan hopi nechi. El a conclui bisando cu tabata un dia largo, cu hopi calor, pero nan a haci un tremendo trabao, y el a yama danki na e team organizador completo di ELMAR.