Exitoso workshop encuanto maltrato di Mucha y Codigo di Proteccion

DMH a yuda grupo garandi di boluntario combina cu algun profesional haya curso

ORANJESTAD (AAN): Dia 22 di november ultimo Departamento di Mucha y Hoben (DMH) a brinda un workshop di Codigo di Proteccion di 3 ora na Hyatt Airport, cu un grupo meta sumamente importante y relevante cu ta traha tambe cu y pa mucha na Aruba.

   Di di sumo importancia cu nos boluntarionan como profesionalnan ta consciente di e risiconan di maltrato di mucha y e posibel señalnan cu ta existi y con nan por haci uzo di e Toolkit di Codigo y Codigo di Proteccion mes, pa proteha nos muchanan den tur contexto riba area social recreativo. 

   E anochi aki no tabata posibel sin sosten di Union Europeo su proyecto: #ACT4ECC, cu ta netamente pa conscientisa henter un comunidad tocante desaroyo di capacidad y pa stop cu abuso di mucha na un manera structural y duradero. Durante e anochi aki por a conta cu presencia di diferente boluntario, pero tambe profesional cu ta labora den e area social y recreativo, manera; Rotaract – Parlamento Hubenil – Cruz Cora – IBiSA – Aruba Sport Unie - Aquatics Federation – Arubaanse Voetbalbond – Aruba Schietbond – Aruba Taekwondo Bond -  Aruba Tang Soo Do Federation - Aruba Volleyball Association - Club di Dam Arowak - Aruba Athletic Federation - Heart Center Leadership – Aruba Triatlon Association – ATHA -  SV La Fama – Biblioteca Nacional Aruba - Peniel Baptist Church - Evangelical Church of San Nicolas - Good Samaritan CC - Iglesia Pentecostal - Cas di Oracion - Iglesia Catolico - Iglesia Avivamiento - Celebrations Church – DAS – UNHCR – HIAS - Scouting Aruba y mas.

   Na final di a anochi e evaluacion a indica cu mayoria di e clubnan ta hopi interesa pa haya mas informacion y tambe guia con pa anda cu e casonan di sospecho di abuso di mucha cu nan ta encontra den nan horarionan. E compromiso sigur t’ey y awor DMH ta bay inicia e trayecto di implementacion di Codigo di Proteccion cerca e organizacionnan aki, cu ya a traha cita caba pa 2024.

   DMH kier gradici un y tur cu tabata presente e anochi aki y cu a aporta cu nan pensamento- y ideanan kico ta e siguiente pasonan concreto den proteccion di mucha. No tin duda, cu cada un di boso ta di gran balor, na momento cu nos ta papia di proteccion di mucha y a pesar cu boso ta wak nan un rato so den siman, boso ta hopi biaha ta nan ‘safe haven’ y nos mester ta ekipa pa brinda nan e ayudo y apoyo cu nan ta pidi p’e.

   DMH kier enfatisa y encurasha cada un di nos, cu nos no ta unda nos mester ta ainda, pero ta tuma henter un comunidad pa tin e disposicon y  boluntad propio, pa realmente traha na bienestar general y proteccion di nos muchanan. Paso no tin duda cu ta tuma henter un comunidad pa lanta un mucha.