ORANJESTAD (AAN): Riba 17 di mei ta celebra dia di “World Telecommunication and Information Society Day”.
Un dia cu ta wordo celebra pa e International Communication Union (ITU) cu ta specialisa den tecnologianan di informacion y comunicacion (ICTs). E aña aki ITU ta enfoca riba un tema hopi actual, esta “Digital transformation in challenging times”.
E crisis di COVID-19 a enfatisa no solamente e rol importante di ICTs pa e funcionamento continuo di sociedadnan. Pero tambe el a trece padilanti e desigualdad digital cu ta reina entre y dentro di paisnan rond mundo y e urgencia pa acelera transformacion digital.
Na Aruba tambe nos a experiencia esaki ora nos mester a adapta nos mes den corto tempo na por ehempel traha for di cas, enseñansa online y haci compras y pagonan online. Avancenan cu mester a bay gradualmente a wordo acelera den un periodo relativamente corto den un normal nobo.
SETAR como compania tambe mester a adapta su mes lihe y a “embrace” oportunidadnan nobo cu esaki a trece cune pa nos organisacion. Algo cu nos ta orguyoso di por a contribui cune den corto tempo ta e Aruba Health App. Un aplicacion cu a prueba di ta un solucion significativo pa por administra varios aspecto relata na COVID-19 tanto pa localnan como bishitantenan di nos isla.
Como compania nacional di telecomunicacion, SETAR tin un rol sumamente importante pa brinda comunidad conexion na tur momento y aporta na e transformacion digital di e pais door di ofrece lo ultimo den innovacion y tecnologianan nobo pa hunto por avansa.
