ELMAR ta contribui na e solucion pa e luznan di Bernhardstraat por funciona bek

ORANJESTAD (AAN): Recientemente ELMAR a publica un comunicado pa duna mas informacion di luznan di caya cu no ta cay bao di maneho di N.V. ELMAR, entre nan luznan den Bernhardstraat.

            Despues di publicacion ELMAR a ricibi un peticion pa asisti y trece un solucion mas pronto cu ta posibel pa e luznan aki por funciona bek.

            Departamento di Netbeheer di N.V. ELMAR ta revisa y drecha e kabelnan bou di tera y tambe controla tur palo di luz y bombillo den Bernhardstraat, entre rotonde di FTA te cu Burger King, Main Street San Nicolas y tambe area di Misa Catolico Santa Teresita pa e luznan aki por funciona. 

            Ta e intencion pa Gobierno pasa tur e luznan di caya pa N.V. ELMAR, manera menciona anterior esaki no a ser concretisa ainda.

            Maneho ta keda bao di Dienst Openbare Werken (D.O.W.).

            ELMAR ta contento di por a contribui na e solucion pa trece claridad y seguridad pa habitantenan di Berhardstraat y cercania.