ORANJESTAD (AAN) – DIARIO a entrevista colega Ricardo Jimenez, cu luna pasa a haya Covid-19,
y el a relata ki momento el a cuminza sinti di malo pa hopi mas malo, y mester a haci e test, y kico a sosode despues di a constata cu e tabata positivo.
“Mi a cuminza sinti sintomanan riba un Diasabra, pero aparentemente, mi a contagia prome cu esey segun DVG a bisa mi.
“E prome sintoma cu mi a haya tabata hopi cansancio, agotamento. Mi no a mire como un sintoma pasobra mi tin dos trabao, y esun cu mi ta haci mainta ta hopi pisa. Anto, mi no a mire manera un sintoma pasobra semper ya pa diasabra mi ta sinti basta cansa. No obstante, mi tabata sinti extra cansa, y e diasabra ey casi mi no por a haci nada. Y casualmente, como un siman prome di a haya e virus, mi a ricibi mi prome vacuna”, Ricardo a relata.
Su Diadomingo siguiente ta e dia cu el a sinti realmente malo. “Mi a bay traha den e part time job, y mi tabata tin hopi dolor di cabes cu ta algo cu hopi biaha mi ta haya. E momento ey no tabata tin keintura, pero banda di 10 or di mainta mi a cuminza sinti hopi malo, pero algo cu mi no por a splica e momentonan ey. Mi tabata sinti algo diferente, y mi a pensa di termina mi trabao y bay cas, pero solamente mi tabata resisti pa e ora yega y mi por a bay cas. Ora mi a yega cas, mi a yama e hefe di Departamento di DIARIO, y bise cu mi tabata sinti malo y cu si mi por traha for di cas. El a bisami cu si, cu no tin problema.
Den oranan di atardi mi a cuminza sinti keintura halto, dolor di cabes y dolor di weso di man y planta di pia. Mi a caba di traha y mi a purba di drumi trempan pasobra mi mester a cuminza traha 5’or di marduga. Pero como cu mi a sigui cu keintura halto mi a manda un mensahe na e gerente di e part time, bise con mi tabata sinti, y el a bisa mi pa no bay traha pasobra nan no por core riesgo, y pa mi percura pa haci e prueba. Di e anochi di Diadomingo na e madruga di Dialuna, ta ora mi a sinti e peor di e sintomanan. Keintura tabata hopi halto y mi a haya hipotermia. Mi tabata tembla hopi y e dolor di man y pia tabata insoportable y mi tabata sinti manera mi ta den un freezer. Mi a lanta y tuma mas paracetamol y mi a hunta un unguento pa musculo den full e curpa incluso cabes. Mi a paga e ventilator y a tapa mi curpa cu klechi, pa keinta mi mes. Dialuna trempan mi a warda te 8 or di mainta pa yama docter di cas. Su asistente a duna mi un pin pa mi check un cita via e app di DVG. Pa 9.30 mi a wak cu tabata tin un espacio disponible, y mi a marke y a bay. Ora mi a sali di mi cas pa bay haci e prueba mi tabata tin dolor di wowo. Mi a kere cu e por tabata dengue, cu mi a yega di haya tambe.
Mi a haci e prueba y bin cas bek, mi a raporta AO pa warda e resultado di e test. Dialuna anochi mes, mi a haya contesta cu e test a sali positivo pa Covid”, Ricardo a splica. Den otro articulo e ta duna su apreciacion tocante e virus.
